Elordadaǵy «Dýman» oıyn-saýyq ortalyǵynda ǵasyrǵa jýyq tarıhy bar «QazAqparat» HAA uıymdastyrýymen boýlıngten memlekettik BAQ ókilderi arasynda týrnır ótti.
Jýrnalıster arasyndaǵy dodaǵa «Kazpravda», «Qazkontent», jarysty uıymdastyrýshy «Qazaqparat» jáne bıyl ǵasyr jasyn toılap jatqan «Egemen Qazaqstan» gazetiniń qyzmetkerleri qatysyp, jarystyń kórigin qyzdyrdy. Sporttyq sharanyń ashylý saltanatynda «Qazaqparat» HAA Bas dırektory Asqar Qumyran jarysty uıymdastyrýdaǵy negizgi maqsat – aqparat izdegen tilshi qaýymyn bir sát bolsa da jumystan tys ýaqytta sergitý, bir-birimen tanystyǵyn arttyrý ekenin aıtty.
Tas sharmen boýlıng keglderin qulatqan básekede BAQ ókilderi ózderiniń tek jazýǵa ǵana emes, sporttyq oıyndarda da myqtylyǵy men eptiligin kórsetti. Tartysqa toly ótken jarysta «Egemen Qazaqstan» gazetiniń jýrnalıster komandasy eń kóp upaı jınap, týrnırde top jardy. Ekinshi oryndy «Qazkontent» quramasy ıelense, úzdik úshtikti «Kazpravdadaǵy» áriptesterimiz túıindedi.
Sondaı-aq atalǵan týrnırde «Egemen Qazaqstan» gazetiniń fototilshisi Erlan Omar eń úzdik straıker atandy. Áriptesterimizdi júldelerimen quttyqtaımyz!