Mádenıet jáne sport mınıstri Aqtoty Raıymqulova Túrkistan oblysynyń mádenıet salasy qyzmetkerlerimen kezdesti. Bul týraly «Áziret Sultan» memlekettik tarıhı-mádenı qoryq mýzeıiniń baspasóz qyzmeti habarlady.
Memleket basshysy Qasym-Jomart Toqaevtyń «Syndarly qoǵamdyq dıalog - Qazaqstannyń turaqtylyǵy men órkendeýiniń negizi» atty Qazaqstan halqyna arnaǵan Joldaýyn iske asyrý jóninde mınıstrlik tarapynan qolǵa alynǵan sharalar týraly baıandaǵan Aqtoty Rahmetollaqyzy mádenıet salasy qyzmetkerleriniń jalaqysyn kóterý, buqaralyq sportty damytý, týrızm salasyn jandandyrý, shetelden keletin týrısterdiń Qazaqstanǵa vızasyz kirý máselelerine toqtaldy.
- Mádenıet salasyna tikeleı qatysy bar adam retinde, jalaqyny arttyrý máselesiniń sheshilýin qanshalyqty kútkenimizdi túsinemin. Budan basqa, áleýmettik jeńildikter máselesi pysyqtalýda. Mádenıet jáne sport mınıstrligi memorandýmdar ázirlep, ákimdikterge jiberdi, olardy oryndaý úshin áleýmettik qoldaý sharalaryn, onyń ishinde mádenıet jáne óner qyzmetkerleriniń turǵyn úı jaǵdaıyn jaqsartýdy qamtıtyn salalyq josparlar bekitiletin bolady,- dedi mınıstr.
Sondaı-aq elimizdegi týrızmdi odan ári damytý úshin Túrkistan oblysynda qolǵa alynǵan jobalar jaıly da sóz boldy.
- Bolashaq týrıstik aımaq bolatyn taǵy da bir oblys – ol Túrkistan oblysy, bul – túrki halyqtarynyń tarıhı jáne rýhanı ortalyǵy. Memleket Basshysynyń tapsyrmasy boıynsha ortaǵasyrlyq Túrkistan qalashyǵyn qalpyna keltirý jóninde belsendi túrde jumystar jalǵasýda. Qaıta qurý nátıjesinde kelýshiler men týrıster sany birneshe ondaǵan mıllıonǵa deıin artady, al olardyń kelý ýaqyty birneshe saǵattan birneshe kúnge deıin artady dep kútilýde, bul oblys ekonomıkasyna qomaqty qarjy quıýdy qamtamasyz etedi. Sondaı-aq «Otyrar» qalashyǵyn iri týrıstik joba retinde qalpyna keltirý jobasynyń tujyrymdamasy ázirlendi. Sonymen qosa, jyl sońyna deıin «Otyrar» vızıt-ortalyǵy ashylady. Al kelesi jyly «Áziret Sultan» memlekettik tarıhı-mádenı qoryq-mýzeıine qarasty Gaýhar ana kesenesi men ortaǵasyrlyq Saýran qalashyǵynda Sapar ortalyǵy boı kóteredi,- dedi Aqtoty Rahmetollaqyzy.
Jıynǵa qatysqan mádenıet salasy qyzmetkerleri de usynys-pikirlerimen bólisti.