Belarýstiń Grodno qalasynda ótip jatqan aýyr atletıkadan Alexander Cup halyqaralyq týrnıri qazaqstandyq sportshylar úshin sátti ótýde. Jarystyń úshinshi kúninde erler arasyndaǵy básekede Rıo Olımpıadasynyń jeńimpazy Nıdjat Rahımovke teń keler qarsylas tabylmady.
Kelesi jyly Tokıoda ótetin Olımpııa oıyndaryna joldama beretin negizgi týrnırdiń biri sanalatyn dodada jarys jolyna 81 kılo salmaqta shyqqan otandasymyz qos saıys nátıjesi boıynsha 344 kılo (151+193) ziltemirdi baǵyndyryp, halyqaralyq týrnırdiń jeńimpazy atandy. Sondaı-aq osy salmaqta synǵa túsken taǵy bir qazaqstandyq sportshy, Rıo Olımpıadasynyń qola júldegeri Denıs Ýlanov ózine berilgen úsh múmkindikti paıdalana almaı, jarysty sátsiz aıaqtady.
Aıta keteıik, buǵan deıin Alexander Cup týrnırinde qyzdar arasyndaǵy básekede synǵa túsken 71 salmaqtaǵy Ekaterına Bykova bas júldeni jeńip alǵan bolsa, týrnırdiń birinshi kúninde 55 kılodaǵy taǵy bir jerlesimiz Zúlfııa Chınshanlo qola medal ıelengen-di.