Almaty qalasy ákiminiń orynbasary Erjan Babaqumarov múmkindigi shekteýli balalar men jasóspirimderge arnalǵan «MEIIRIM» ońaltý ortalyǵynda boldy. Bul týraly Almaty qalasy ákimdiginiń baspasóz qyzmeti habarlady.
2004 jyly ashylǵan ortalyqta alǵashqy kúninen bastap BSP jáne aýtızm dıagnozy bar 200-ge jýyq bala ońaltýdan jáne áleýmettendirýden ótken. Bul ortalyq – balalardyń kúni boıy ata-anasyz júrýine múmkindik beretin eldegi alǵashqy memlekettik emes mekeme.
Munda 3 jastan 16 jasqa deıingi múmkindigi shekteýli balalar men jasóspirimderdiń jan-jaqty damýy, áleýmettenýi jáne oqýy úshin barlyq qajetti jaǵdaılar jasalǵan.
«Jabdyqtalý jaǵynan flagman bolyp tabylatyn bul ortalyqtyń qala turǵyndarynyń áleýmettik ál-aýqatyn jaqsartyp, ońaltý máselesin sheshýde mańyzy zor», – deıdi Almaty qalasy ákiminiń orynbasary Erjan Babaqumarov.