Premer-Mınıstr Asqar Mamın «Aýyl – El besigi» jobasyn júzege asyrý, sondaı-aq, elorda aınalasynda «azyq-túlik beldeýin» qurý aıasynda Aqmola oblysynyń Selınograd aýdanyndaǵy Rodına aýylyna jumys saparymen baryp, onda «Rodına» agrofırmasy» JShS jumysymen tanysty. Bul týraly primeminister.kz habarlady.
Úkimet basshysy aýyl sharýashylyǵy tehnıkasy parkin, sút kesheni men «Rodına» agrofırmasynyń zaýytyn aralady, sondaı-aq, attas aýyldyń áleýmettik ınfraqurylym nysandaryn — hokkeı kortyn, orta mektepti, sýpermarket pen jaıly páterlerdi kórdi.
«Elbasy Nursultan Nazarbaev jáne Prezıdent Qasym-Jomart Toqaev aýyl men agroónerkásiptik keshendi damytý máselelerine zor kóńil bólip otyr. Sizderdiń agrofırma Qazaqstandaǵy jetekshi ári úlgili kásiporyndardyń biri, jınaqtalǵan tájirıbeni elimizdegi basqa da sharýa qojalyqtaryna taratý qajet», — dedi A. Mamın.
«Rodına» agrofırmasynyń basshysy I. Saýer Premer-Mınıstrge kásiporynnyń jumysyn odan ári keńeıtý jónindegi josparlary týraly baıandady.
«Rodına» agrofırmasy 2005 jyly attas keńshar bazasynda qurylǵan, Qazaqstandaǵy ósimdik sharýashylyǵy men mal sharýashylyǵy ónimderin óndirý jáne qaıta óńdeý boıynsha jetekshi sharýa qojalyqtarynyń biri. JShS-da jumys isteıtinder sany — 520 adam. Sońǵy úsh jylda ortasha jyldyq óndiris kólemi 2,52 mlrd teńgeni qurady. Agrofırma sıyrlardy saýý jáne qolda baǵý úshin sıfrlyq tehnologııalardy, jel-energetıka qondyrǵysy men basqa da ozyq tehnologııalyq júıelerdi paıdalanady.
Egis alqaptary qurylymyna dándi (bıdaı, arpa, suly), maıly (kúnbaǵys, zyǵyr maıy) daqyldar, súrlemge júgeri, bir jyldyq jáne kóp jyldyq shópter, kartop, kókónister kiredi. Sharýashylyq qara shubar jáne golshtıno-frız tuqymdy iri qara maldy ósiretin asyl tuqymdy mal zaýyty dárejesine ıe.