Bul týraly Prezıdenttiń baspasóz hatshysy Berik Ýálı Facebook paraqshasynda jazdy.
«Qurmetti qaýym! Búgin ózderińizben Kókshe tórinde júzdesip otyrmyz. Arqanyń aıryqsha sulý aımaǵy – búkil elimizdiń mereıi ári maqtanyshy. Bul – tarıhy tereń, tabıǵaty ǵajaıyp kıeli ólke. Tuǵyry bıik tulǵalar shyqqan qasterli óńir. Elordany aınala qorshap jatqan Aqmolanyń strategııalyq mańyzy joǵary. Osy jerdiń turǵyndary el ekonomıkasyn órkendetýge eleýli úles qosyp keledi. Sondyqtan oblystyń búgingi tynys-tirshiligimen qatar, damý keleshegi – elimiz úshin óte mańyzdy mindetterdiń qatarynda.
Qurmetti jıynǵa qatysýshylar! Men Joldaýda aıtyp óttim, ekonomıkalyq ósimdi jáne tyń ózgeristerdi elimizdiń árbir turǵyny sezinýi qajet. Biz halyqtyń ál-aýqatyn arttyrýdy árdaıym basty nazarda ustaýymyz kerek. О́ńirde turatyn azamattarymyzdyń turmys sapasy joǵary standarttarǵa saı bolýy tıis. Bul, eń aldymen, jergilikti halyq turǵyn-úı, áleýmettik qoldaý, ınfraqurylym sııaqty ıgilikterdi kórýi tıis degen sóz. Sol sebepti barlyq deńgeıdegi ákimder jumysty jańa talapqa saı, tıimdi uıymdastyrýy qajet. Osyǵan oraı, búgingi jıynda Aqmola oblysyn damytý máselelerin qarastyramyz», dep jazdy Berik Ýálı.