QR Premer-Mınıstri Asqar Mamın jáne Azııa damý bankiniń (ADB) prezıdenti Takehıko Nakao ADB men QR Úkimeti arasyndaǵy «Qazaqstannyń uzaq merzimdi básekege qabilettiligin damytý» forsaıt sessııasyna qatysty.
«Bıyl bizdiń ınstıtýttarymyzdyń sapasy men ekonomıkalyq ósý áleýetine zor úles qosqan Azııa damý bankimen tyǵyz yntamaqtastyǵymyzǵa 25 jyl toldy», - dedi A. Mamın.
Premer-Mınıstr Qazaqstan Úkimetiniń aldynda Qazaqstan ekonomıkasynyń básekege qabilettiligin arttyrý mindeti turǵanyn atap aıtty.
«Ekonomıka salalarynyń ınstıtýsıonaldyq áleýetin nyǵaıtý, reformalardy ýaqytyly ázirleý jáne tıimdi júrgizý óte mańyzdy. Bul turǵyda ADB biz úshin asa quzyretti ınstıtýsıonaldyq seriktesterdiń birine aınalady, onyń aýyl sharýashylyǵy, ınfraqurylym, týrızm jáne óńirlik damýdaǵy tájirıbesin búkil álem moıyndaǵan jáne ol kóptegen elderdiń memlekettik baǵdarlamalarynan kórinis tapqan», - dedi A. Mamın.
Bul kezdesý Qazaqstan men ADB-nyń strategııalyq paıymdaý jáne Qazaqstannyń básekege qabilettiligin boljaý boıynsha alǵashqy birlesken oı talqysy boldy. Oǵan Úkimet músheleri, ulttyq holdıngter men damý ınstıtýttarynyń basshylary qatysty.
Qatysýshylar forsaıttyń ádistemesi men halyqaralyq tájirıbesin qarastyrdy, sondaı-aq 5 sektor boıynsha jol kartalary men is-qımyl josparyn talqylap, ázirledi: agroónerkásiptik keshendi damytýǵa arnalǵan ınfraqurylym, týrızm ekonomıkanyń basty bóligi retinde, qaldyqtardy óńdeý úshin “aqyldy qala” qosymshasy, QR ındýstrııalyq-ınnovasııalyq damýy úshin forsaıt, óńirlik damý arqyly básekege qabilettilikti arttyrý.
1994 jyldan beri ADB Qazaqstanda qarjyny, ınfraqurylymdy, energetıkany, kommýnaldyq qyzmetter sektoryn jáne basqa salalardy damytý boıynsha memlekettik jobalardy júzege asyrýǵa $5,1 mlrd-tan asa zaım bóldi. Qazirgi sátte $3,8 mlrd-qa 30-ǵa jýyq joba tolyq júzege asyrylǵan.
ADB $49 mln-ǵa kólik jáne aýyl sharýashylyǵy keshenderinde, bilim berýde, densaýlyq saqtaýda, shaǵyn jáne orta bıznesti damytýda jáne basqa da salalarda 100-ge jýyq tehnıkalyq kómek jobasyn qarjylandyrdy. $628 mln-nan astam qarjy kólik salasyndaǵy, kommýnaldyq qyzmetterdegi, mal sharýashylyǵyndaǵy jáne t.b. jeke sektor jobalaryn iske asyrýǵa bólindi.