2026 jylǵy 7 aqpanda Almaty qalasynda «Qazaqstannyń jańa Konstıtýsııasy - qazaqstandyq qoǵamnyń jańa mán-maǵynasy men qundylyqtaryn qalyptastyrý» taqyrybynda sarapshylyq talqylaý ótti. Bul týraly Fılosofııa, saıasattaný jáne dintaný ınstıtýtynyń baspasóz qyzmeti málimdedi, dep habarlaıdy Egemen.kz.
Talqylaýǵa ǵylymı qaýymdastyq ókilderi, sarapshylar jáne Konstıtýsııalyq komıssııa músheleri qatysty. Qatysýshylar jobanyń negizgi erejelerin, sonyń ishinde halyqaralyq jáne ulttyq quqyq arasyndaǵy úılesimdilik, reformalardyń gýmanıtarlyq jáne qundylyqtyq aspektileri, azamattyq qatysý mehanızmderin damytý jáne memleket pen qoǵam arasyndaǵy ózara árekettestikti nyǵaıtý máselelerin qarastyrdy.
«Reformalardyń gýmanıtarlyq ólshemin jáne mádenı-ıdentıfıkasııalyq faktorlardy eskerý qoǵamdyq damýdyń sabaqtastyǵyn saqtaýǵa jáne qundylyqtyq baǵdarlardy nyǵaıtýǵa yqpal etedi», dep atap ótti A. Baıtursynov atyndaǵy Til bilimi ınstıtýtynyń dırektory, Konstıtýsııalyq komıssııa múshesi Anar Fazyljanova.
Fılosofııa, saıasattaný jáne dintaný ınstıtýty bas dırektorynyń ǵylymı jumys jónindegi orynbasary Sholpan Djamanbalaeva Konstıtýsııa jobasynda ártúrli áleýmettik toptardyń jáne azamattyq qoǵam ınstıtýttarynyń múddelerin eskerýge arnalǵan mehanızmder qarastyrylǵanyn aıta ketti.
Instıtýttyń Álemdik jáne qazaq fılosofııasy ortalyǵynyń jetekshisi Serik Nurmuratov Jobany talqylaý qoǵamnyń joǵary qyzyǵýshylyǵyn tanytqanyn jáne turaqty konstıtýsııalyq normalardy saqtaý mańyzdy ekenin qosa aıtty.
Kezdesý qorytyndysy boıynsha qatysýshylar jańa Konstıtýsııa jobasy eldiń quqyqtyq damýynyń sapaly jańartylǵan modelin qalyptastyratynyn atap ótip,konstıtýsııalyq reformany memlekettiń jáne qoǵamnyń jańǵyrýyndaǵy mańyzdy kezeń retinde qoldady.