Túrkistan oblysy, Otyrar aýdanynda qalyń jurt kórnekti aqyn, ult qaıratkeri, Qazaqstannyń Halyq jazýshysy Muhtar Shahanovpen qoshtasty. Aqynnyń amanatyna saı, janazasy oqylyp, týǵan jeriniń topyraǵyna jerlendi, dep habarlaıdy Egemen.kz.
Qoshtasý rásimine elimizdiń ár óńirinen kelgen zııaly qaýym ókilderi, aqyn-jazýshylar, memleket jáne qoǵam qaıratkerleri, oqyrmandar qatysyp, aqyn rýhyna taǵzym etti. Qaraly jıynda Túrkistan oblysynyń ákimi Nuralhan Kósherov sóz sóılep, Muhtar Shahanovtyń qazaq rýhanııatyndaǵy orny aıryqsha ekenin atap ótti.
«Qazaq rýhanııaty aýyr qazaǵa ushyrady. Muhtar Shahanov – ult múddesin bárinen bıik qoıǵan qaısar tulǵa. Ol sanaly ǵumyryn til men dástúrdi ulyqtaýǵa arnady, poezııany jańa bıikke kóterdi», dedi óńir basshysy.
Jıynda sondaı-aq Májilis depýtattary men zııaly qaýym ókilderi sóz alyp, aqynnyń azamattyq ustanymy men shyǵarmashylyq murasyn erekshe qurmetpen eske aldy. As berilip, Quran baǵyshtalyp, marqumnyń rýhyna duǵa jasaldy.
Memleket basshysy Muhtar Shahanovtyń otbasyna kóńil aıtý jedelhatyn joldady
Muhtar Shahanov – poezııa arqyly halyqtyń ar-ojdanyn, ulttyq namysyn asqaqtatqan iri tulǵa. Ol qoǵamdyq ómirde de belsendi bolyp, Jeltoqsan oqıǵasy, til taǵdyry, ulttyq sana máselelerin batyl kóterdi. Ár jyldary KSRO halyq depýtaty, Parlament Májilisiniń depýtaty, Qazaqstannyń Qyrǵyz Respýblıkasyndaǵy Tótenshe jáne ókiletti elshisi qyzmetterin atqardy.
Aqynnyń shyǵarmashylyq murasy asa baı. Onyń týyndylarynda adamgershilik, mahabbat, rýhanııat pen órkenıet taǵdyry tereń kórinis tapqan.
Muhtar Shahanovtyń eńbegi joǵary baǵalanyp, ol «Qazaqstannyń Eńbek Eri», «Qazaqstannyń Halyq jazýshysy», «Qyrǵyz Respýblıkasynyń halyq aqyny» ataqtaryna ıe boldy.
Aqynnyń artynda qalǵan mol rýhanı murasy men taǵylymdy joly keler urpaqqa qyzmet ete beretini anyq.
Almatyda Muhtar Shahanovty aqtyq saparǵa shyǵaryp saldy