Almaty qalasyndaǵy balalarǵa arnalǵan juqpaly aýrýlar aýrýhanasynda kishkentaı naýqastyń anasy men medısına qyzmetkeri arasynda janjal týyndady. Oqıǵa boıynsha polısııa tergeý júrgizip jatyr, dep habarlaıdy Egemen.kz.
Áleýmettik jelide taraǵan beınejazbada áıel men dáriger arasyndaǵy daýdyń sońy medısına qyzmetkerine kúsh qoldanýmen aıaqtalǵany baıqalady.
Aýrýhana ákimshiliginiń málimetinshe, 31 mamyr kúni túngi saǵat 00:07-de eki jasar bala qabyldaý bólimine jetkizilgen. Dáriger tekserýden keıin balany aýrýhanaǵa jatqyzý qajet degen sheshim qabyldaǵan. Alaıda sol kezde balanyń qasynda zańdy ókili emes, kámeletke tolmaǵan ápkesi bolǵan.
Qazaqstan zańnamasyna sáıkes, kámeletke tolmaǵan balany aýrýhanaǵa jatqyzý úshin zańdy ókiliniń kelisimi qajet bolǵandyqtan, medısına qyzmetkerleri anasynyń kelýin kútken.
Astanada feldsherge shabýyl jasaǵan er adamǵa úkim shyqty
Aýrýhanaǵa kelgennen keıin balanyń anasy men medısına qyzmetkeri arasynda túsinispeýshilik týyndap, janjalǵa ulasqan. Beınebaqylaý jazbalary men kýágerlerdiń aıtýynsha, dárigerge qatysty kúsh qoldaný áreketi bolǵan.
Oqıǵa ornyna polısııa shaqyrylyp, tıisti aryz qabyldanǵan. Aýrýhananyń ishki tekserýi nátıjesinde dárigerdiń áreketi qoldanystaǵy zań talaptary men medısınalyq mekemeniń ishki tártip erejelerine sáıkes bolǵany anyqtalǵan. Sondaı-aq balany aýrýhanaǵa jatqyzýdan bas tartý nemese medısınalyq kómek kórsetpeý faktileri tirkelmegen.
Erlikpen qaza tapqan feldsherge týǵan jerinde eskertkish taqta ornatyldy
Almaty qalalyq polısııa departamentiniń habarlaýynsha, atalǵan oqıǵa boıynsha Alataý aýdandyq polısııa basqarmasy jan-jaqty tekserý júrgizip jatyr. Qazirgi ýaqytta eki tarap ta polısııaǵa aryz bergen.
Quqyq qorǵaý organdary oqıǵanyń barlyq mán-jaıyn anyqtap, ár taraptyń áreketine zań aıasynda baǵa beriletinin málimdedi.