Qorǵanys mınıstrligi Jambyl oblysynyń Talas aýdanynda áskerı ushqyshsyz ushý apparatynyń shtattan tys qoný faktisin rastady. Málimetterge súıensek, oqys oqıǵaǵa tehnıkalyq aqaý sebep bolýy múmkin, dep habarlaıdy Egemen.kz.
Mınıstrliktiń málimetinshe, 2 maýsym kúni Qarýly kúshterdiń Áýe qorǵanysy kúshterine tıesili ushqyshsyz ushý apparaty josparly oqý-jattyǵý ushýyn oryndaý kezinde shtattan tys qonǵan.
Oqıǵa Jambyl oblysynyń Talas aýdany aýmaǵynda bolǵan. Saldarynan zardap shekkender joq, sondaı-aq ǵımarattar men ınfraqurylym nysandaryna zaqym kelmegen.
Vedomostvo turǵyndar úshin eshqandaı qaýip joq ekenin málimdedi.
Oqıǵanyń barlyq mán-jaıyn anyqtaý úshin arnaıy komıssııa quryldy. Qazirgi ýaqytta apparat qulaǵan aýmaqty tekserý jáne sebepterin anyqtaý jumystary júrgizilip jatyr.
Aıta keteıik, buǵan deıin Batys Qazaqstan oblysynda taǵy bir dron qulaǵanyn habarlaǵan bolatynbyz.