Qazaqstannyń otyn naryǵynda aýyl sharýashylyǵy shıkizatyn tereń óńdeýge baǵyttalǵan jańa ónim – BI-95 avtokólik otynynyń óndirisi iske qosyldy, dep habarlaıdy Egemen.kz.
Jańa joba aıasynda bıoetanoldy paıdalaný arqyly óndiriletin otyn ónerkásiptik deńgeıde shyǵaryla bastady. Bul elimizde alǵash ret agrarlyq ónimniń tolyq óndiristik sıkl arqyly óńdelip, daıyn motor otyny retinde naryqqa shyqqan alǵashqy ónim.
Elimizdiń qaı óńirinde benzın men dızel arzan?
Bıoetanol Soltústik Qazaqstan oblysynda ornalasqan BioOperations kásipornynda óndiriledi. Bul keshen bıdaıdy tereń óńdeýge mamandanǵan biregeı óndiris orny bolyp sanalady. Shıkizat tek azyq-túlik nemese jem retinde emes, joǵary qosylǵan quny bar ónim retinde qaıta óńdeledi. Keıin daıyn bıoetanol BioPetrolCompany bazasynda BI-95 otynynyń quramyna qosylyp, naryqqa shyǵarylady. BI-95 otyny quramynda 5-10 paıyz bıoetanol bar benzın túri sanalady. Ol janarmaıdyń negizgi tehnıkalyq sıpattamalaryn saqtaı otyryp, ekologııalyq kórsetkishterin jaqsartýǵa múmkindik beredi.
Mamandardyń aıtýynsha, bıoetanol kómirtekti beıtarap komponent retinde qarastyrylyp, shyǵaryndylardy azaıtýǵa yqpal etedi.
«Biz úshin BI-95-ti iske qosý − eń aldymen ekologııalyq qadam. Biz tek jańa otyn túri týraly emes, qorshaǵan ortaǵa túsetin naqty júktemeni azaıtý týraly aıtyp otyrmyz. Bıoetanoldy paıdalaný shyǵaryndylardy aıtarlyqtaı qysqartýǵa múmkindik beredi, bul ásirese aýa sapasy máselesi birinshi kezekte turǵan Almaty sııaqty qalalar úshin óte mańyzdy», dep atap ótti joba jetekshisi Laýra Bergibaeva.
Oral áýejaıy avıaotyndy ártúrli baǵamen satyp kelgen
Kompanııa málimetine sáıkes, jańa otyndy paıdalaný úshin avtokólikterdi qaıta jabdyqtaý qajet emes. BI-95 standartty benzın qozǵaltqyshtarynda esh ózgerissiz qoldanyla beredi. Synaq nátıjeleri onyń qýat pen tıimdilik kórsetkishteri dástúrli benzın deńgeıinde saqtalatynyn, al keı jaǵdaılarda shyǵaryndylardyń azaıatynyn kórsetken.
Aıta keteıik, bıoetanol qosylǵan otyn túrleri Eýropalyq odaq, AQSh jáne Japonııa sııaqty elderde uzaq jyldan beri keńinen qoldanylyp keledi. Qazaqstan da osy baǵytty kezeń-kezeńimen damytyp keledi.