Qurlyqtyq hokkeı lıgasynda (QHL) synǵa túsip jatqan elordanyń «Barys» klýby «Barys Arenada» Habarovskiniń «Amýr» komandasymen kezdesip, qosymsha ýaqytta ese jiberdi.
Bes myń jankúıer tamashalaǵan oıyndy jerlesterimiz tamasha bastady. Birinshi kezeńniń 14-mınýtynda Arkadıı Shestakov oıynshylar sanynyń basymdyǵyn paıdalanyp, komandasyn esepte alǵa shyǵardy. Ekinshi kezeńdi de joǵary deńgeıde bastaǵan «Barys» oıynshylary 35-mınýtta tablodaǵy esepti eseleı tústi. Shaıba avtory – Pavel Akolzın.
Eki shaıba artyqshylyǵymen alda turǵan «Barys» hokkeıshileri tym erkinsip ketti me, áıteýir ekinshi kezeń sońynda qaqpasyna gol ótkizip aldy. Tomash Zogornanyń shaıbasynan keıin esep 2:1-ge qysqardy. Al úshinshi kezeń bastalǵan bette «Amýr» oıynshysy Ondrjeı Vıtasek mergendigimen kózge túsip, esepti teńestirip ketti.
Degenmen overtaımda Habarovskiden kelgen hokkeıshilerdiń baǵy jandy. 64-mınýtta Igor Rýdenkov gol soǵyp, komandasyna jeńis syılady. Qorytyndy esep – 2:3. «Barys» kelesi oıynyn búgin Magnıtogorskide jergilikti «Metallýrg» komandasyna qarsy ótkizedi.