Jankeldın aýdanyndaǵy tórt túlik mal órgizgen Aralbaı aýylynda «Bolashaqqa baǵdar: rýhanı jańǵyrý» baǵdarlamasy sheńberindegi «Týǵan jerge taǵzym» aksııasy aıasynda Uly Jeńistiń 75 jyldyq mereıtoıy qarsańynda Uly Otan soǵysynyń ardagerlerine, osy surapyl soǵystan oralmaǵan bozdaqtarǵa, qýǵyn-súrgin qurbandaryna, 1928 – 1932 jyldary asharshylyqta qaza tapqan jerlester rýhyna arnap, «Máńgilik alaý» eskertkish-belgisi ornatyldy.
– Torǵaılyqtar el men jerdiń tarıhyna óte sergek qaraıdy. Sebebi atalarymyz osy jerde ashtyqtan qyryldy, qýǵyndy da kórdi, al talaı bozdaq soǵystan qaıtpaı, shańyraǵy ortasyna tústi. Bul eskertkish-belgi aýyldastardyń eljandylyǵymen, perzenttik paryzdy joǵary sezinýimen paıda boldy. Birliktiń arqasy, – deıdi aýyl ákimi Qoıshybek Moldabekov. Qazir qaı jerde qandaı da irili-ýaqty is qarjysyz júzege aspaıdy. Eskertkishtiń ashylý saltanatynda aýdan ákimi Shota Ospanov osy iske demeýshilik kórsetken Tóretaı Álmambetov, Álibı Bekqalı, Eljan Hamzın, Qulahmet Shaıhystanov, Muhıt Turǵynbekuly sekildi kásibin dóńgeletken aýyldastardyń qolyn qysyp, rahmetin aıtty.
Shalǵaıda jatqan Aralbaı sekildi aýyldarda adamdardyń iskerligimen qatar aınalasyn uıytatyn belsendiligi, birligi ǵana týǵan jerdi tozýdan saqtaıdy, kórkeıtedi. Aralbaılyq Balǵabaı Qabjanov, Baıǵara Toqsanbekov, Serik Mustafın, Sapar Qozykın, Hamıt Ańsaǵaev sekildi azamattardyń bastamalary, ıgilikti isteri aýyldy rýhanı terbetip otyrady. Jeıtin asy men kıer kıimine taryqpaýmen qatar, kóńilge shýaq tóger qyzyqty ortasy bar aýyldan eshkim de kóshkisi joq. Shaǵyn fýtbol alańyn da birinshi salǵan osy aýyl. Qazybaı áýlıe mazaryna qurylys jumystaryn júrgizip, zııarat etýge kelgender úshin basyna úı saldy. «Kostychev» JShS-niń dırektory Balǵabaı Qabjanovtyń demeýshiligimen Jangeldın orta mektebinde IT synyby ashyldy.
Aralbaıdaǵy ashtyq pen soǵys qurbandaryna arnap turǵyzylǵan eskertkish belginiń ózi aýyldan júrekke jyly tıer lep eskendeı áser berdi.
Qostanaı oblysy,
Jankeldın aýdany,
Aralbaı aýyly