Kenshiler astanasy kóktaıǵaqpen kúresti keshendi túrde bastap ketti. «Mádenıet, demalys saıabaqtary jáne gúlzarlar basqarmasy» mekemesiniń bas ınjeneri Talǵat Smaıylov málimdegendeı, osy maqsatqa dep qazirgi ýaqytta 500 tonna qum-tuz qospasy daıyndalǵan.
Jalpy, atalǵan kásiporyn oblys ortalyǵyndaǵy 90-nan astam nysannyń aýmaǵyn qar men muzdan tazalaýǵa jaýapty. Basqarma shtatynda barlyǵy 180 jumysshy jáne 50 mehanızator bar. Barlyq aýmaq segiz ýchaskege bólingen, olardyń árqaısysyna jeke brıgada bekitilgen.
Bas ınjener Talǵat Smaıylovtyń aıtýynsha, qar tazalaý tehnologııasynyń ózi bylaı qaraǵanda op-ońaı bolyp kóringenimen, ózindik qıyndyqtary men jaýapkershiligi bar sharýa eken.
– Qar tazalaý tehnologııasy birneshe kezeńnen turady. Aldymen ol jıektastarǵa sypyrylady, sodan keıin jınalady jáne polıgondarǵa tasymaldanady. Kóktaıǵaq kezinde qum-tuz qospasy da qoldanylady. Jumysshylar qar úıindisin qolmen syndyrady, eskertkishterden, baspaldaqtardan jáne oryndyqtardan qardy tazalaıdy, kezdeısoq qoqystardy jınaıdy, qardy tıeý kezinde kómek kórsetedi. Qalǵan jumystardy soqa-sypyrtqy jabdyǵy bar traktorlar, ózdiginen júk aýdaratyn kólikter, frontaldi júk tıegishter – barlyǵy 40 birlik arnaıy tehnıka túrleri atqarady, – deıdi ol.
Kásiporynnyń jumysshylary jaı kúnderi tańǵy saǵat 8:00-den keshki 16:00-ge deıin eńbek etedi. Al qar qalyń jaýǵan kúnderi olar tańǵy tórtten túnniń bir ýaǵyna deıin eki aýysymmen jumys isteıdi.
Qaraǵandy oblysy