Avstralııa mamandary sý astymen júzýshiler úshin akýlanyń shabýylynan qorǵaıtyn erekshe gıdrokástómniń eki túrin oılap tapty. Bul týraly ITAR-TASS habarlady.
Birinshi kástóm aq jáne aspan kók, sosyn aq jáne kók tústerge boıalǵan. Sebebi, akýlanyń kórý qabileti nashar bolǵandyqtan, mundaı túske boıalǵan kástómder sý astyndaǵy kórinispen astasyp ketip, jyrtqyshtyń shabýyldaý qaýpin tómendetse kerek. Onyń ústine, akýlalar tek qara men aq tústerdi ǵana ajyrata biledi.
Gıdrokástómderdiń ekinshi túrinde aq pen qara jolaqtar beınelengen. Mundaı kástóm kıgen adamdy akýla ýly balyqpen shatastyryp, kóbine oǵan shabýyldaýǵa táýekel etpeıtin kórinedi.
Kástómdi jasap shyǵarýǵa eki jyl ýaqyt jumsalǵan. Bul ýaqyt aralyǵynda ǵalymdar onshaqty tájirıbe júrgizip, kıimdi manekenderge kıgizip sý astynda tekserip kórgen. Synaqtan ótkizý barysynda eshbir maneken shabýylǵa ushyramaǵan, degenmen, taýardy óndirýshiler kostıýmnyń qaýipsizdigine tolyq kepildik berýden bas tartady.
Gıdrokástóm satylymǵa shyǵyp ta úlgerdi. AQSh-ta onyń baǵasy shamamen 400 dollardy qurap otyr.
Aıdar О́risbaev.