Ata-jurtynan alysta júrgen baýyrlarymyzdyń ul-qyzdaryn táýelsiz memleketimizdiń búgingi jetistikterimen tanystyryp, kemeldi bolashaǵyn kórsetý maqsatynda, sonymen qatar jastardyń ata-babalary bir zamandary ómir súrgen mekenin tanystyrý nıetinde osydan jeti jyl buryn “Qazaqstan – ata jurtym, qasıetim – ana tilim” atty halyqaralyq olımpııada jeti jyldan beri úzdiksiz ótkizilip keledi. Bul shara Elbasy Nursultan Nazarbaevtyń shetelderdegi qandastardy qoldaý jónindegi 1998 jylǵy О́kimine baılanysty júzege asyrylyp kele jatyr. Bıylǵy olımpııada kıeli Jaıyq óńirindegi Oral qalasynda keshe óz jumysyn bastady. Oblystyq drama teatrynyń ǵımaratynda ótken alǵashqy dıdarlasý kezinde jer ana kelbetindegi ana – qazaqtyń arǵy-bergi tarıhyn jyr tilinde aıta kelip, sahna tórine Kúltegin, Tonykók, Tumar hanym, Syrym batyr sekildi alyptardy shyǵaryp, ataly sózderin aıtqyzdy.
Budan keıin tórtkúl dúnıeniń burysh-buryshynan kelgen ul-qyzdardy, naqtylaı tússek Qytaı, Fransııa, Monǵolııa, Reseı, О́zbekstan, Qyrǵyzstan t.b. memleketterden kelgen oqýshylardy oblys ákiminiń orynbasary Nurlan Noǵaev quttyqtap, elim, jerim dep kelgen jas urpaqtyń osy ata-jurtym degen iltıpatynyń astarynda úlken jeńistiń jatqanyn tilge tıek etti. Al Bilim jáne ǵylym mınıstrligine qarasty “Daryn” ortalyǵynyń dırektory T.Bıtýova jeti jyl ishinde júzdegen jastardyń otanyna kelip joǵarǵy oqý oryndaryna túskenin, olardyń aldy qazir qyzmet etip júrgenin jetkizse qazylar alqasynyń tóraǵasy, akademık О́mirzaq Aıtbaev ıgilikti sharaǵa uıtqy bolǵan oblystyń azamattaryna shyn nıetten alǵysyn bildirdi .
Saltanatty rásim ústinde qaladaǵy mektep oqýshylary ázirlegen án-kúı alma-kezek sahna tórinen kórinis taýyp, jıylǵan jurttyń erekshe iltıpatyna ıe boldy. Endigi jerde shetelden kelgen alpystan asa oqýshylardyń júzden júırik shyqqandarǵa Bilim jáne ǵylym mınıstrliginiń arnaıy granty tapsyrylatyn bolady.
Temir QUSAIYN.