Aqtaýda №2 arnaýly áleýmettik qyzmetter kórsetý ortalyǵynda QR Memlekettik qyzmet isteri agenttiginiń Mańǵystaý oblysy boıynsha departamenti ujymynyń, ólkemizge belgili ónerpazdardyń qatysýymen qarııalar men aq jaýlyqty analarǵa Jańa jyl qarsańynda merekelik kóńil kúı syılaǵan ádemi kesh uıymdastyryldy. Bul týraly QR Memlekettik qyzmet isteri agenttigi Mańǵystaý oblysy boıynsha departamentiniń baspasóz qyzmeti habarlady.
Aýmaqtyq departament basshysy, Ádep jónindegi keńesiniń tóraǵasy Nurgúl Jannazarova óziniń quttyqtaý sózinde memlekettik qyzmetshiler tarapynan aǵa býyn qarııalarǵa degen ystyq iltıpatyn bildirýdi ózderiniń qasıetti paryzy sanaıtyndyǵyn jáne osyndaı kezdesý is-sharalary arqyly jas urpaqtyń boıynda adamgershilik qasıetterin darytýdy mindet dep esepteıtindigin jetkizip, ujym atynan ústel oıyndary men túrli kitaptar, jemis-jıdekterdi tartý etti.
Kóńildi keshti júrgizgen óńirimizge belgili asaba ári shoý-men Rýstem Tańatarov pen otbasylyq «Arna» ansambli jáne «Padıshah» bı toby óz ónerlerimen kórermenderdi tánti etti. Balasha qýanǵan qarııalar oıyn oınap, keńestik dáýir fılmderinen popýrrı, áýezdi án men yrǵaqty bıdi tamashalap,uıymdastyrýshylarǵa alǵystaryn bildirip, ıgi tilekterin jetkizdi.
Aıta keteıik, oblystyq qarttar úıine Departament ujymy 2017 jyldyń 1 qazanynan bastap, merekelik ataýly kúnderde quttyqtap, túrli konsertter men teatrlyq kórinisterge shaqyryp turady.
Mańǵystaý oblysy