Elordada kommýnaldyq qyzmetter parki jańa arnaıy tehnıkamen tolyqty. Joldar men trotýarlardy qardan tazalaý úshin 60-tan astam tehnıka alyndy. Bul týraly Nur-Sultan qalasy ákimdiginiń baspasóz qyzmeti habarlady.
Olardyń ishinde samosvaldar, avtogreıderler, qum shashqyshtar, traktorlar jáne t.b. Kóktem men jaz mezgilderi paıdalanýǵa bolatyn 50-ge jýyq arnaıy tehnıka alý josparlanyp otyr.
Aıta keteıik, 2019 jyldyń jeltoqsan aıynda kommýnaldyq qyzmetter parki 70-ke jýyq arnaıy tehnıkamen tolyqty. Kommýnaldyq qyzmetkerlerdiń aıtýynsha, eski tehnıkanyń tozýy 30-dan 50% - ǵa deıin quraǵan. Park tehnıkasyn jańartý qyzmetkerler úshin qolaıly eńbek jaǵdaılaryn jasaýǵa jáne sanıtarlyq tazalaýdyń sapasyn arttyrýǵa múmkindik beredi. Arnaıy tehnıka qarajatty ońtaılandyrý men «QDB Lızıng» AQ-men birlese satyp alý esebinen alyndy. Tehnıkanyń basym bóligi - otandyq ónim.
Elorda ákimi Altaı Kólginovtyń tapsyrmasyna sáıkes 2020 jyldyń qańtarynan bastap kommýnaldyq qyzmetkerlerdiń jalaqysy 10-nan 45%-ǵa deıin ósti. Sonymen qatar eńbekaqy tóleýdiń yntalandyrýshy júıesi engizildi. Bul da kommýnaldyq qyzmetkerlerdiń jalaqysyn arttyrýǵa múmkindik berdi.