Keshe Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa BUU-nyń Qazaqstandaǵy Damý baǵdarlamasymen birlesip “Strategııa—2020: áıelderge arnalǵan jańa múmkindikter” atty halyqaralyq konferensııa ótkizdi.
Konferensııany ashqan Eńbek jáne halyqty áleýmettik qorǵaý mınıstri, Prezıdent janyndaǵy áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova ótip jatqan sharanyń mańyzy joǵary ekendigin atap ótti. Mınıstr hanym 2010 jylǵa deıingi damýdyń strategııalyq josparyn qorytyndylaı kelip, Elbasynyń Qazaqstan halqyna “Jańa onjyldyq – jańa ekonomıkalyq órleý – Qazaqstannyń jańa múmkindikteri” atty Joldaýynda aıtylǵan genderlik saıasat tóńireginde oı qozǵady.
2010 strategııalyq josparyn oryndaý barysynda Qazaqstanda úlken ózgerister oryn alǵany málim. Memlekettiń áleýmettik mindeti tııanaqty oryndalyp, ár adamnyń ortasha aılyǵy bes ese ósti. Al zeınetkerlerdiń tólemi úsh esege ósti. Analardyń ólim deńgeıi eki esege tómendedi, bala týý sany 1,5 esege ósken. Elimizdiń osyndaı jetistikterin kórip otyrǵan BUU 2009 jylǵy baıandamasynda Qazaqstandy adam kapıtaly damýy jaǵynan joǵary dárejede dep baǵa berdi.
Genderlik saıasattyń elimizdegi kórinisi de talaı ózgeristerden, kezeńderden ótti. Mysaly, sheshim qabyldaý deńgeıindegi áıelder sanynyń artýy sonyń aıǵaǵy. Eýropa osydan birneshe ǵasyr buryn áıelderin erkine jibergenimen, otbasy, oshaq qasyna qaıta kirgize almaı qor bolyp otyrǵanyn búkil álem kórip otyr. Al bizdiń elimizdiń áıel qaıratkerleri otbasynda analyq qyzmetin atqarsa, túzde kez kelgen er adam ıyǵy kótere bermeıtin jumysty alyp júrgendigi kóńil marqaıtady.
Konferensııa barysynda eki seksııa jumys istedi.
Venera TÚGELBAI.