Bul týraly Premer-mınıstr Prezıdenttiń tóraǵalyǵymen ótip jatqan Úkimettiń keńeıtilgen otyrysynda aıtty.
«Úkimet sizdiń saılaý aldyndaǵy tuǵyrnamańyzdy is júzinde iske asyrý máselesin erekshe baqylaýda ustaıdy. Osy maqsatta jańa ekonomıkalyq kún tártibi ázirlendi, ol ekonomıkanyń sapaly ósýin qamtamasyz etý jáne halyqtyń naqty ál-aýqatyn arttyrý jónindegi qurylymdyq jáne júıeli sharalar keshenin qamtıdy. Siz qoıǵan mindetterdi tıimdi sheshý úshin Úkimet pen árbir memlekettik organda Jobalyq keńseler quryldy. 7 basym baǵyt pen 104 sharadan turatyn portfel qalyptasty. Olardy iske asyrý boıynsha jumystar júıeli túrde júrgizilip keledi. Elbasynyń strategııalyq bastamalaryn, sizdiń saılaýaldy tuǵyrnamańyzdyń negizgi baǵyttaryn jáne 2019 jylǵy 2 qyrkúıektegi Qazaqstan halqyna Joldaýyn iske asyrý úshin ótken jyly 8 memlekettik baǵdarlama ázirlenip, qabyldandy»,- dedi Úkimet basshysy.
Budan ózge Asqar Mamın álemdik ekonomıkany damytýdyń túrli ssenarııleri kezinde eldiń makroekonomıkalyq, qarjylyq jáne áleýmettik turaqtylyǵyn saqtaý boıynsha sharalar keshenin qamtıtyn daǵdarysqa qarsy jospar qalyptastyrylǵanyn atap ótti.
Premer-mınıstr Úkimet jumysynyń negizgi basymdyǵy halyqtyń naqty tabystary men ómir súrý sapasyn arttyrý ekenin alǵa tarta otyryp, bul mindet keshendi túrde sheshiletinin aıtty.
«2020 jyly bıýdjettik sala qyzmetkerleriniń jalaqysy artty. Shaǵyn jáne shaǵyn bıznes úshin 3 jylǵa tekserýge moratorıı jáne tabys salyǵyn tóleýden bosatý engizildi. 2020 jyly Úkimet ınvestısııalardy tartýdy, ónimdiligi joǵary jumys oryndaryn qurýdy, ınfraqurylymdy damytýdy, eksportqa baǵdarlanǵan ındýstrııalandyrýdy, otyn-energetıkalyq jáne agroónerkásiptik keshenderdi, sondaı-aq ekonomıkany sıfrlandyrýdy kózdeıtin jeti strategııalyq baǵyt boıynsha jumysty jalǵastyrady», dedi Asqar Mamın óz sózinde.