Keshe Premer-Mınıstr Kárim Másimov ortalyq jáne jergilikti atqarý organdary basshylarynyń qatysýymen selektorlyq keńes ótkizdi, dep habarlady Premer-Mınıstrdiń baspasóz qyzmeti.
Onda Almaty jáne Shyǵys Qazaqstan oblystarynyń ákimderi tótenshe jaǵdaılar zardaptaryn joıý jáne sý tasqynynan zardap shekken eldi mekenderdi qalpyna keltirý is-sharalaryn uıymdastyrý jumystary jóninde baıandady.
Almaty oblysynyń ákimi S.Úmbetov Aqsý aýdanyndaǵy tótenshe jaǵdaıdan zardap shekken eldi mekenderdegi jaǵdaıdyń qalypqa túsip kele jatqanyn, qalpyna keltirý jumystaryna 52 qurylys uıymdary tartylyp, jańa úıler qurylysy bastalǵanyn habarlady. Qazirgi kúni tótenshe jaǵdaıdyń zardaptaryn joıý úshin 2 mıllıard 700 mıllıon teńgeden astam aqshalaı jáne materıaldyq kómek jóneltildi.
Tarbaǵataı aýdanyndaǵy aǵymdaǵy jaǵdaı týraly Shyǵys Qazaqstan oblysynyń ákimi B.Saparbaev habarlap, bútindeı alǵanda ahýaldyń baqylaýda turǵanyn jetkizdi. Tasqynǵa qarsy jumystar júrgizý úshin Úkimet 850 mıllıon teńge bóldi. Qutqarý jáne qalpyna keltirý jumystaryna Tótenshe jaǵdaılar, Kólik jáne kommýnıkasııa, sol sııaqty Qorǵanys mınıstrlikteriniń kúshteri jumyldyrylýda.
Tótenshe jaǵdaılar mınıstri Vladımır Bojko memlekettik materıaldyq rezervterden qajetti zattar daıyndaý jóninen jumystardyń bastalǵanyn habarlady. Tótenshe jaǵdaılar qyzmetiniń mamandary oblys ákimdigi ókildigimen birlesip, aýdandaǵy qar erýdiń jaǵdaıyn qadaǵalaýda jáne qaýipti degen aımaqtardaǵy sý tasqyny ahýalyna únemi monıtorıng júrgizýde.
K.Másimov Premer-Mınıstrdiń birinshi orynbasary О́.Shókeevke Shyǵys Qazaqstan oblysyna baryp, ákimmen birlese otyryp, jergilikti jerde qajetti sharalar qabyldaý jóninde tapsyrma berdi.