Prezıdent «Samuryq-Qazyna» UÁQ» aksıonerlik qoǵamynyń basqarma tóraǵasy Ahmetjan Esimovti qabyldady. Kezdesý barysynda Qazaqstan Prezıdentine Ulttyq ál-aýqat qorynyń 2019 jylǵy jumystarynyń nátıjeleri baıandaldy. Bul týraly Aqordanyń baspasóz qyzmeti habarlady.
Ahmetjan Esimovtiń aıtýynsha, qordyń negizgi óndiristik jáne qarjylyq kórsetkishteri artqan. Kiris kólemi 2018 jylǵy 10,1 trıllıon teńgeden 2019 jyly 10,7 trıllıon teńgege artyp, taza paıda 2018 jyly 1,1 trıllıon teńge, al 2019 jyly 1,2 trıllıon teńge boldy. Qordyń aktıvteri 10 paıyzǵa artyp, 26,5 trıllıon teńgege jetti.
Sonymen qatar «Samuryq-Qazyna» UÁQ» aksıonerlik qoǵamynyń basqarma tóraǵasy otandyq óndiristi qoldaýǵa, satyp alýlar isindegi jergilikti kásiporyndardyń úlesin qamtamasyz etýge baǵyttalǵan keshendi sharalar engizý jóninde málimet berdi.