Búgin, 10 aqpan kúni, Qazaqstan Bıatlonshylar Odaǵynyń prezıdenti Ermek Qızatovtyń jetekshiligimen Odaqtyń tártiptik komıssııasynyń kezekten tys jıyny ótti. Atalǵan jıynǵa Mádenıet jáne sport mınıstrligi, sondaı-aq, Qazaqstan Ulttyq Olımpıadalyq komıtetiniń ókilderi qatysty. Komıssııa músheleri álem chempıonaty qarsańynda Avstrııada ótip jatqan oqý-jattyǵý jıyndarynda sporttyq rejım men tártipti buzǵan tórt qazaqstandyq sportshynyń máselesin qarastyrdy. Bul jaıynda Ulttyq olımpıadalyq komıtettiń baspasóz qyzmeti habarlady.
Qazaqstan ulttyq quramasynyń sapynan tórt sportshy shettetildi. Olar bıatlonnan ótetin respýblıkalyq jáne halyqaralyq jarystarǵa qatystyrylmaıdy. Atap aıtar bolsaq, Anton Pantov tórt jylǵa, Tımýr Kýs, Vladıslav Vıtenko jáne Roman Eremın bir jylǵa sporttan shettetildi. Sportshylardyń barlyǵy jattyǵý jıynynan qaıtarylǵan.
Sheshimdi qabyldaýǵa bıatlonnan ulttyq qurama bas bapkeri Maqsat Sharanovtyń raporty jáne sportshylar men bapkerlerdiń túsiniktemesi sebep boldy. Sondaı-aq Obertıllah qalasyndaǵy oqý-jattyǵý jıyny kezinde komanda músheleri turaqtaǵan avstrııalyq qonaqúıdiń aryz-shaǵymy da nazardan tys qalǵan joq.
«Qazaqstan UOK ókilderi men Mádenıet jáne sport mınıstrligi, sonymen qatar, ulttyq federasııa músheleri sporttyq rejımdi óreskel buzǵan atletterdi ulttyq quramadan shettetý týraly sheshimdi biraýyzdan qabyldady. Sportshylar jattyǵý jıynynda tártip buzyp qana qoımaı, óz elderiniń abyroıyna nuqsan keltirip otyr. Halyqaralyq jarys bolsyn, jabyq oqý-jattyǵý jıyndary bolsyn, Qazaqstan komandasynyń múshesi óz eliniń bedeline kir keltirmeýi qajet. Bul oqıǵa ulttyq qurama namysyn qorǵaıtyn barsha sportshylarǵa sabaq bolady dep oılaımyn. Qazaqstan UOK sporttyq tártipti buzýshylarǵa túbegeıli qarsy. Mundaı jaǵdaılar kóp kezdese bermeıdi, biraq, rejımdi buzǵany úshin árbir atlet pen bapkerler jaýapkershilik arqalaıtynyn eskertkimiz keledi. Osy oraıda, atalǵan jaǵdaıǵa qatysty dereý sheshim qabyldaǵan Qazaqstan Bıatlonshylar odaǵyna alǵys aıtamyz», - dedi Qazaqstan UOK sport Dıreksııasynyń basshysy Elsııar Qanaǵatov.
Bıatlonnan Qazaqstan komandasynyń bapkerler quramyna qatysty tıisti tártiptik sharalar bólek qabyldanady. Aıta ketelik komıssııa quramynda Qazaqstan bıatlonshylar Odaǵynyń birinshi vıse-prezıdent Aıtalap Qorǵambaev, vıse-prezıdent Elena Hrýstaleva, QBO bas hatshysy Manas Úsenov jáne komandanyń bas bapkeri Maqsat Sharanov bar.Sonymen qatar jıynǵa Mádenıet jáne sport mınıstrliginiń dene shynyqtyrý jáne sport komıteti tóraǵasynyń orynbasary Serik Jarasbaev, UOK qysqy sport túrleri qyzmetiniń jetekshisi Oljas Besbaev ta qatysty.