Iá, bıyl óńirdegi qys jyldaǵydaı jaımashýaq emes, turǵyndardy ábden áýrege salyp-aq tur. Bir kún boran, bir kún aıaz, bir kún jylymyq. Senesiz be, senbeısiz be, 11 aqpanda oblystyń bir ǵana aýdanynda 60 kólik pen 202 adam kómekke zárý boldy.
Kókpekti aýdanyndaǵy Baıbýra men О́mesh asýyn bilmeıtin aımaq turǵyndary az shyǵar. Ásirese qystyń kózi qyraýda jolǵa jıi shyǵatyn aǵaıyn qos asýdy jaqsy biledi. 11 aqpanda osy eki asýda 200-ge jýyq jolaýshy qar qursaýynda qaldy. Baıbýra ýchaskesi kúndizgi saǵat 12-de jabylǵan-dy. Alaıda oǵan deıin Kókpekti aýylynan Qalbataýǵa shyǵyp ketken 35 kólik, ıaǵnı 112 adam aqtútek boran kesirinen jolda toqtaýǵa májbúr bolǵan edi. Kómekke Kókpektidegi №33 órt sóndirý bólimi jiberilip, jolaýshylar Kókpekti aýylyndaǵy Sháıjúnisov jáne Kókpekti orta mektepterine, týystaryna jáne qonaqúılerge ornalastyrylypty. Al «О́skemen – Samar» baǵytyndaǵy О́mesh asýyndaǵy jol ýchaskesi de osy kúni kúndizgi saǵat 12-de jabylǵan bolatyn. Alaıda tańerteń ertemen О́skemennen shyqqan jolaýshylar (25 kólik, 90 adam) «О́skemen –Samar» jolynyń 112 shaqyrymynda qar qursaýynda qalǵan-dy. Bul jerge kómekke Samardaǵy №51 órt sóndirý bóliminiń KÝNG tehnıkasy men О́skemendegi oblystyq Tótenshe jaǵdaı departamenti tarapynan TREKOL kóligi kelip, jolaýshylardy Samar aýylyndaǵy sport mektebine, agrotehnıkalyq kolledjge, Samar bastaýysh mektebine, týystary men qonaqúılerge ornalastyrdy. Budan bólek 11 aqpanda «О́skemen – Altaı – Katonqaraǵaı – Rahman qaınary» baǵytyndaǵy jolda 97 kólik qarǵa batyp, shaǵyn avtobýstan 6 adam qaýipsiz jerge jetkizildi, qalǵan 303 jolaýshy (sonyń 36-sy bala) kómekten bas tartty. Oblystyq Tótenshe jaǵdaılar departamenti baspasóz qyzmetiniń taratqan málimetterine sensek, óńirde tek 11 aqpanda 30 adam qar qursaýynan shyǵarylyp, 463 adam qaýipsiz oryndarǵa jáne 142 kólik arnaıy tehnıkalar kómegimen mejeli jerlerine jetkizildi.
Sonymen qatar keshe óńirdiń birneshe qalasy men aýdanyndaǵy mektepterde sabaq toqtatyldy. Borodýlıha aýdanynda aıaz 32, Altaı men Jarmada 30, Ulan aýdany men О́skemende 28, Semeı men Kýrchatovta 23 gradýske jetip, 1 aýysymnyń 1-4-synyp oqýshylary sabaqtan bosatyldy. Al Glýbokoe aýdanynda gradýs baǵany 32, Kókpekti aýdanynda 30, Shemonaıhada 28, Besqaraǵaıda 28, Rıdderde 27-ni kórsetip, 1 aýysymnyń 1-9-synyptary jospardan tys demalýǵa májbúr boldy. Zaısan aýdanynda kóktaıǵaq bolǵandyqtan, 1 aýysymnyń 1-11-synyp oqýshylary sabaqqa barǵan joq.
Shyǵys Qazaqstan oblysy