Qasym-Jomart Toqaevtyń Mıýnhendegi jumys saparynyń ekinshi kúni Kýveıttiń Premer-Mınıstri sheıh Sabah Halıd ál-Hamad as-Sabahpen kezdesýden bastaldy. Bul týraly Aqorda habarlady.
Memleket basshysy eki eldiń memleketaralyq baılanystarynyń dostyq sıpatyn jáne onyń qarqyndy damyp kele jatqanyn atap ótip, ekijaqty jáne kópjaqty formattaǵy ózara yntymaqtastyqty nyǵaıtý úshin áleýettiń jetkilikti ekenine nazar aýdardy.
– Biz Islam yntymaqtastyǵy uıymy aıasynda senimdi seriktespiz. Qazaqstannyń astanasy Nur-Sultan qalasynda Islam uıymynyń azyq-túlik qaýipsizdigi jónindegi shtab-páteri ashyldy. Bul da bizdiń ózara yqpaldastyǵymyzǵa tyń serpin beredi, – dedi Memleket basshysy.
Qasym-Jomart Toqaev 2019 jylǵy qańtarda «Jýsan» gýmanıtarlyq operasııasyn júzege asyrý kezinde áskerı-áýe bazasyn paıdalaný máselesin sheshýge kómekteskeni úshin Kýveıt úkimetine rızashylyq bildirdi.
Sonymen qatar Qazaqstan Prezıdenti eki eldiń ekonomıkalyq yqpaldastyǵynyń, sonyń ishinde qurylys, energetıka, aýyl sharýashylyǵy, qarjy, ınvestısııa jáne týrızm salalarynyń áleýeti zor ekenin atap ótti.
Kýveıttiń Premer-Mınıstri Qazaqstanmen baılanystardy nyǵaıtýdyń perspektıvalaryna joǵary baǵa berdi.
– Elderimiz arasyndaǵy saýda-ekonomıkalyq, ınvestısııalyq, mádenı-gýmanıtarlyq, týrıstik baǵyttarda yntymaqtastyq ornatý úshin úlken áleýet bar, – dedi Kýveıt úkimetiniń basshysy.
Sheıh Sabah Halıd ál-Hamad as-Sabah eki el arasyndaǵy saýda-ekonomıkalyq yntymaqtastyq jónindegi úkimetaralyq komıssııanyń aldynda mańyzdy mindetter turǵanyn atap ótti. Ol komıssııanyń aldaǵy ýaqytta ótetin 4-otyrysynda Qazaqstan-Kýveıt qatynastaryn jańa deńgeıge shyǵarýǵa múmkindik beretin jańa ádister ázirlenetinine senim bildirdi.
Kezdesý sońynda Qasym-Jomart Toqaev Kýveıttiń Premer-Mınıstrin Qazaqstanǵa saparmen kelýge shaqyrdy.