Búgin S.Seıfýllın atyndaǵy oblystyq ámbebap kitaphanada balalar jazýshysy Rıma Ábiqaevanyń balalarǵa arnalǵan kitaptarynyń tusaýkeseri bolyp, mektep oqýshylarymen jyly júzdesý ótkizildi. Sharaǵa oblys ákiminiń birinshi orynbasary Lazzat Turlashov qatysty. Bul týraly Almaty oblysy ákiminiń baspasóz qyzmeti habarlady.
Aldymen sóz alǵan Lazzat Turlashov elimizde balalardyń bilim alýy men tárbıesine jasalyp otyrǵan jaǵdaılar, balalar ádebıetiniń urpaq tárbıesindegi róli jaıly qysqasha baıandap, jazýshynyń taldyqorǵandyq balǵyndarmen kezdesýine sáttilik tiledi.
Rıma Ábiqaeva Taldyqorǵanǵa kelgendegi maqsatyna qysqasha toqtalyp, sózin óz shyǵarmalaryn oqýmen jalǵastyryp, balalarǵa ertegi oqyp berdi. Erteginiń mazmunyna baılanysty arnaıy jasalǵan sýretti bezendirýler teleekranda qatar júrip otyrdy. Bul oqýshylar úshin óte áserli boldy. Munan keıin jazýshynyń kitaptaryn shyǵarý isin uıymdastyrýshy, QR Fýtgolf federasııasynyń prezıdenti Svetlana Toqqulova balalardan oqylǵan ertegiler týraly pikirlerin surap, áńgimege tartty. Oqýshylarǵa qazaq jáne orys tilderinde túrli tústi kórkem sýrettermen bezendirilgen jazýshynyń kitaptary taratyldy. Oqýshylar avtorǵa túrli saýaldaryn qoıyp, áńgimeni jandandyra tústi.
Kezdesý sońynda R. Ábiqaevaǵa L. Turlashov Jetisý óńiri jaıly kitapty syıǵa tartsa, jazýshy óz tarapynan S.Seıfýllın atyndaǵy kitaphana qoryna 50-ge tarta kitaptaryn tartý etti.
Atap ótsek, jazýshy Rıma Ábiqaeva 2-9 jastaǵy balalarǵa arnap 29 ertegi, 70 óleń jazǵan. Reseıdegi I.A.Býnın atyndaǵy Jaratylystaný ǵylymdary akademııasynyń kúmis medaliniń ıegeri.