Qostanaı oblysynda «Eńbek» nátıjeli jumyspen qamtý jáne jappaı kásipkerlikti damytý baǵdarlamasynyń aıasynda ótken jyly 22 jarym myń adam jumyspen qamtylǵan.
Onyń 75%-i, ıaǵnı 16 myń 900 adam turaqty jumysqa ornalasqan. Búgin oblystyq máslıhat depýtattarynyń kezekti sessııasynda baǵdarlamanyń óńirde júzege asyrylý barysy týraly sóz boldy. Jumyspen qamtýdy úılestirý jáne áleýmettik baǵdarlamalar basqarmasynyń basshysy Aıda Qusaıynovanyń aıtýynsha, byltyr baǵdarlamanyń birinshi baǵyty boıynsha oblystaǵy 33 bilim mekemesi 2 682 adamdy 35 mamandyq túri boıynsha qaıta daıarlaý kýrstarynda oqytyp shyqqan.
Bul azamattardyń jartysynan kóbi jumysqa ornalasty. Baǵdarlamanyń ekinshi baǵyty boıynsha jańa bıznes-ıdeıalardy júzege asyrý maqsatynda óńir turǵyndaryna jalpy kólemi 364,5 mln teńge bolatyn 769 grant berildi. 480 azamat grant qarjysyn eńbek quraldaryn alýǵa jumasasa, 205 adam tehnologııalyq qurylǵylar alýǵa, 84 grant ıesi mal men qus satyp alýǵa jumsady, - dedi basqarma basshysy.
«Eńbek» baǵdarlamasy aıasynda bıyldan bastap kóp balaly analar men turmysy tómen otbasylardy shaǵyn kásipkerlikke kóptep tartý kózdelip otyr. Bul maqsatta 7 jyl merzimge jyldyq syıaqysy 4% bolatyn 21 mln teńgege deıin jeńildetilgen nesıe berý qarastyrylǵan.
QOSTANAI