Keshe tańerteń Densaýlyq saqtaý mınıstrliginiń resmı ókili Dıas Ahmetshárip Almatyda juqpaly dertti juqtyrǵan úsh naýqastyń anyqtalǵanyn habarlady. Onyń aıtýynsha, 2018 jylǵy kishkentaı qyz bala «Berlın – Mınsk – Almaty» ushaǵymen 13 naýryzda kelgen. Ol qazir Almaty qalasyndaǵy balalar ınfeksııalyq aýrýhanasyna jatqyzyldy. Al qalǵan eki naýqas – 10 naýryz kúni Máskeýden ushyp kelgen, biri 1956 jylǵy, ekinshisi 1966 jylǵy azamat.
Ile-shala túske qaraı Densaýlyq saqtaý mınıstri Eljan Birtanov Nur-Sultan qalasynda birden indet juqtyrǵan 14 naýqastyń tirkelgenin jetkizdi. «Bul naýqastar tártip boıynsha karantınge jatqyzylyp, olarmen baılanysta bolǵan barlyq azamat anyqtalýda», dedi mınıstr.
Sondaı-aq E.Birtanov Bas sanıtarlyq dárigerdiń jańa qaýlysymen qaýipti memleketterdiń qatary qaıta qaralyp, ózgergenin aıtty. Atap aıtqanda, búkil azamattar karantınge jatqyzylýy tıis 1 «A» sanatyndaǵy memleketterge Fransııa, Iran, Italııa, Ispanııa jáne Germanııa engizildi. 1 «B» sanatyna Qytaı, Koreıa jáne búkil Shengen aımaǵyndaǵy memleketter jatqyzyldy. Bul elderden kelgen azamattar mindetti túrde úı karantıninde bolýy kerek. Mınıstr bul elderden keletin shetel azamattarynyń elimizge kirýine tyıym salynǵanyn da atap ótti. Al 2-sanattaǵy Fılıppın, Qatar, Úndistan, Birikken Arab Ámirlikteri, Ulybrıtanııa, Ázerbaıjan, Taıland jáne AQSh-tan keletin azamattar medısınalyq monıtorıngke alynady. Sonymen qatar osy qaýly boıynsha elimizdegi búkil medısınalyq uıymdarǵa, áleýmettik medısınalyq uıymdarǵa jáne ınternattarǵa karantın engiziledi. Mundaıda bul mekemelerge tek óz qyzmetkerleri ǵana kirýge ruqsat. Buǵan qosa mınıstr sanıtarlyq dezınfeksııalaý kúsheıtiletinin de aıtty.
Nur-Sultan qalasy qoǵamdyq densaýlyq saqtaý basqarmasynyń basshysy Sáýle Qısyqova elordada koronavırýs juqtyrǵan 14 naýqaspen baılanysqan adamdardyń tizimi jasalyp jatqanyn habarlady. «JRVI-men elordada stasıonarda jatqan áıeldiń otbasyndaǵy bir adam Germanııadan kelgen bolatyn. Baılanysqan adamdar retinde ony baqylaýǵa aldyq. 16 naýryz kúni áıeldiń boıynan klınıkalyq belgiler baıqalǵanda, birden aýrýhanaǵa jatqyzylyp, tekserildi. Búgin koronavırýstyq ınfeksııa anyqtaldy», dedi ol Ortalyq kommýnıkasııalar qyzmetindegi onlaın brıfıngte.
S.Qısyqovanyń aıtýynsha, Ońtústik Koreıa men Italııadan kelgen 4 qazaqstandyq ta 16 naýryzda reısten túsirilip, oqshaýlanǵan. Endi olarmen baılanysta bolǵan adamdar anyqtalýda. 14 adamnyń 5-eýi qaladaǵy ınfeksııalyq bloktyń stasıonarynda jatqan. Qalǵan 9 adam da aýrýhanaǵa jatqyzyldy. Bulardyń barlyǵy Qazaqstannyń azamattary. 5 kisi elimizdiń ózge óńirleriniń turǵyndary bolsa, bireýi Nur-Sultanda ýaqytsha turyp jatqan, al endi biri elorda turǵyny.
Tústen keıin qaıtadan shuǵyl habarlandyrý jasaǵan D.Ahmetshárip vırýs juqtyrǵan taǵy 5 adamnyń tirkelgenin jetkizdi. Onyń 4-eýi Almatyda, 1-eýi elordada anyqtalǵan. Keshegi jaǵdaı boıynsha Almatyda koronavırýs juqtyrǵandardyń sany 15 adam bolsa, elordada 18-ge jetken. Jalpy elimiz boıynsha 33 naýqas tirkelip otyr.