Almaty qalasy ákimdiginiń baspasóz ortalyǵynda Qoǵamdyq densaýlyq basqarmasynyń basshysy Tileýhan Ábildaev 18 naýryz saǵat 12.00-degi ýaqyt boıynsha qaladaǵy epıdemııalyq jaǵdaıdy habarlady.
Búginde qalada koronavırýsty juqtyrǵan 17 jaǵdaı rastalyp, tirkeldi. Sońǵy eki málimet boıynsha olar indetti juqtyrǵandar – 1974 jylǵy jáne 1998 jylǵy áıelder. Máskeý reısimen ushyp kelgen alǵashqy naýqas juqpaly aýrýhanada em alýda. 1998 jylǵy naýqas 15 naýryz kúni Stambýl-Almaty reısimen ushyp keldi.
Qazirgi ýaqytta naýqastarmen baılanysta bolǵan azamattarǵa izdeý jumystary júrgizilýde. Búginde qalalyq juqpaly aýrýlar aýrýhanasynda 14 naýqas, balalar juqpaly aýrýlarynda 2 bala jáne bir balanyń anasy bar. Olarmen baılanysta bolǵan barlyq adamdar 14 kúndik karantınge jabyldy.
Almaty Qoǵamdyq densaýlyq basqarmasynyń basshysy Tileýhan Ábildaev qalanyń stasıonarynda qajetti dári-dármekter men dezınfeksııalaý quraldary bar ekenin atap ótti.
«Koronavırýstyq ınfeksııa boıynsha emdelip jatqan eki balanyń jaǵdaıy qanaǵattanarlyq, dene qyzýy joq, aýrý sımptomsyz ótýde. Eki jastaǵy qyzdyń anasynda koronavırýs rastaldy. Jasandy jeldetý apparatynda birde-bir naýqas joq», – dedi T. Ábildaev.
Ol sondaı-aq, Ystambýldan ushyp kelgen qyz túnde jedel járdem shaqyrǵan. Biraq aýrýdyń aıqyn belgileri bolmady. Biraq dárigerler analız alyp, tańerteń onyń dıagnozyn rastady. Túrkııa buryn úı karantınine jatatyn elder tobyna kirmegen edi.
Koronavırýsqa qarsy kúreske Úkimet rezervinen 73,5 mln. teńge, jergilikti bıýdjetten 94,5 mln. teńge bólindi.
Almaty qalasy boıynsha basqa óńirlerden kelgen emdelýshilerdi jatqyzý shekteýleri bar. Biraq jalpy medısınalyq uıymdar burynǵy keste boıynsha jumys isteıtin bolady.
Koronavırýstyq ınfeksııanyń taralýymen kúresýge 1300-den astam medısına qyzmetkeri tartyldy. Juqtyrǵandarmen jumys isteý kezinde olar qaýipsizdik rejımin saqtaıdy. Qorǵanys kostıýmderin kıedi, kire beriste temperatýra ólshenedi. Qaýipti jaǵdaılardaǵy jumys úshin olarǵa qosymsha tólem qarastyrylǵan.
ALMATY