Bul jóninde Batys Qazaqstan oblystyq máslıhatynyń kezekti sessııasy otyrysynda óńir basshysy Ǵalı Esqalıev habarlady. Ákimniń aıtýynsha, naýryz aıynyń basynda Orynbor qalasynda ótken kezdesýde reseılikter Irekli sý qoımasynan jiberiletin sý mólsherin byltyrǵymen salystyrǵanda eki ese kóbeıtýge kelisken.
Mamandardyń aıtýynsha Jaıyq ózenindegi sý deńgeıi naýryz aıynyń sońyna taman kóterile bastamaq. Oblys ákimi mol sýdy paıdalanyp, óńirdegi sý qoımalary men arnalardy barynsha toltyryp alýdy tapsyryp otyr.
Batys Qazaqstan oblystyq tabıǵı resýrstar jáne tabıǵat paıdalanýdy retteý basqarmasynyń basshysy Rınat Sháýenov bıyl Reseı aýmaǵynda jaýyn-shashyn kóp bolǵanyn, bul sý qorynyń 80 paıyzy Reseı jetinde qalyptasatyn Jaıyq ózeni úshin jaqsy jańalyq ekenin aıtady.
- Kelisilgen kestege sáıkes, naýryzdyń 20-synan bastap Jaıyqqa beriletin sýdyń mólsheri sekýndyna 60 tekshemetr bolsa, 25 naýryzda – 90, al naýryzdyń sońynda sekýndyna 180 tekshemetr sý berile bastaıdy. Jaıyq arnasynyń 55 paıyz sý qoryn quraıtyn Saqmar ózeniniń de deńgeıi bıyl joǵary. Sondyqtan biz bıyl kóktemde joǵarydan Jaıyqqa keletin sý byltyrǵydan anaǵurlym kóp bolady dep kútip otyrmyz, - deıdi Rınat Satymuly.
Byltyr Batys Qazaqstan oblysynda sý tapshylyǵynan Jaıyq ózeniniń deńgeıi sońǵy 50 jyldaǵy eń tómen kórsetkishti kórsetip, ekologııalyq apat dárejesine taıap qalǵan bolatyn. Iаǵnı Jaıyqtyń ortasha deńgeıi ádette 594 sm shamasynda bolsa, byltyr onyń kólemi 240 sm-den aspady. Onyń ústine bıylǵy qys qarsyz, jaýyn-shashynsyz boldy. Ekologtardyń «Eger sý deńgeıi osylaı quldyraı berse, Jaıyq maýsymdyq ózen bolyp qalýy ábden múmkin» degen tujyrymy jergilikti turǵyndardy qatty alańdatqan.
«Bıyl Jaıyqqa keletin sý kólemi byltyrǵydan 2-2,5 ese kóp bolady» deıdi Ǵalı Esqalıev. Al oblystyń ońtústigindegi Jánibek, Qaztalov jáne Jańaqala aýdandarynyń qajeti úshin Edil sýyn Jánibek sý arnasyna jáne Qaraózen men Saryózenge quıý úshin 2 mlrd teńge qarjy respýblıka bıýdjetinen qarastyrylǵan. Bul 72-75 mln tekshemetr sý degen sóz.
- Biz Reseıden keletin sý shyǵyndary úshin qosymsha taǵy 1 mlrd teńgeniń jobalyq qujatyn jasap, qarjy surap otyrmyz. Eger bul usynysty Úkimet qoldasa, oblystyń sýǵa qajettiligi tolyq óteledi, - deıdi Rınat Sháýenov.
Batys Qazaqstan