CoViD-19 vırýsyn juqtyrǵandar sany 179 myńnan asty, onyń 7,4 myńy kóz jumǵan. Qytaıdaǵy Ýhan ýnıversıteti janyndaǵy Chjýnnan aýrýhanasynyń ǵalymdary vırýstyń kúnnen kúnge qalaı qubylatynyn anyqtady dep habarlaıdy egemen.kz tilshisi Life.ru saıtyna silteme jasap.
Koronavırýstyń bir qaýpi – bul indetti sýyq tııýmen shatystyryp alý óte ońaı eken.
CoViD-19 ınfeksııasyn alǵash tirkegen ýhandyq mamandar 138 pasıentti zerttep, aýrý aǵymyn kezeńderge bólgen. Osylaısha, aýrýdyń eki negizgi kezeńi ataldy.
Birinshisi 7 kúnge sozylady. Birinshi kúndegi keń taraǵan alǵashqy belgisi – qaltyrap, qyzý kóterilý. Naýqastardyń 99%-ynda joǵary temperatýra baıqalǵan.
Ekinshi kúni qatty sharshaý seziledi. Sondaı-aq qurqaq jótel paıda bolyp, bulshyqetter aýyrady. Keıbir jaǵdaıda loqsý jáne ish ótý baıqalady.
Jetinshi kún – bul kezeńniń aıaǵy. Demek, aýrý juqtyrǵandardyń 85%-ynyń densaýlyǵy durystala bastaıdy. Mundaı jaǵdaıda eger siz ózi-ózińizdi oqshaýlaǵan bolsańyz ári eshkimmen baılanys ornatpasańyz, jumysyńyzdy jalǵastyrýyńyzǵa bolady.
Alaıda, eger jetinshi kúni tynys alý joldary qıyndasa, onda bul – ekinshi kezeń bastalǵanynyń belgisi.Ekinshi kezeń taǵy eki aptaǵa sozylady, alaıda, bul vırýs juqtyrǵandardyń 15 paıyzyna ǵana qaýipti. Mundaı kezde aýrýhanaǵa qaralǵan jón, sebebi pasıent aýrýhanaǵa jatýdy qajet etýi múmkin. Ádette naýqas koronavırýstan 17-kúni qaıtys bolýy múmkin. 21-kúni ekinshi kezeń aıaqtalady.
Osy eki kezeńnen ótken naýqastar jumysyn jalǵastyrýǵa qaýqarly bolady.
Aıta ketý kerek, DDSU koronavırýsqa qarsy vaksına synaǵy bastalǵanyn habarlaǵan bolatyn.