Elimizde mádenı-buqaralyq jáne sporttyq is-sharalarda qoǵamdyq tártipti qamtamasyz etý úshin uıymdastyrýshylarǵa jeke kúzet uıymdaryn tartýǵa múmkindik beretin normalar qabyldandy. Bul týraly Májilis depýtaty Oljas Quspekov áleýmettik jelidegi paraqshasynda habarlady, dep jazady Egemen.kz.
Depýtattyń aıtýynsha, bul ózgerister konsertter men sporttyq matchtar sııaqty kommersııalyq is-sharalarǵa polısııa kúshiniń kóptep tartylýyna baılanysty qalyptasqan tájirıbeni ózgertýge múmkindik beredi.
«Búginde mádenı-buqaralyq jáne sporttyq is-sharalarda qoǵamdyq tártipti qamtamasyz etý úshin jeke kúzet uıymdaryn tartýǵa múmkindik beretin normalar qabyldandy. Bul aldaǵy ýaqytta, mysaly, Enrıke Iglesıas konserti kezinde Ishki ister mınıstrligi qyzmetkerlerin tartý mindetti bolmaıtynyn bildiredi», dep jazdy Oljas Quspekov.
Almatydaǵy Djennıfer Lopestiń konserti qansha tabys ákeldi
Onyń aıtýynsha, buǵan deıin kommersııalyq is-sharalarda tártipti saqtaý úshin myńdaǵan polısııa qyzmetkeri jumyldyrylyp kelgen. Sonyń aıqyn mysaly − Djennıfer Lopes konserti. Bul sharada qoǵamdyq qaýipsizdikti qamtamasyz etý úshin IIM qyzmetkerleri men áskerı qyzmetshilerden 3500-den astam adam tartylǵan.
Depýtat keltirgen málimetke sáıkes, tek 2024-2025 jyldary ishki ister organdary 5 myńnan astam buqaralyq is-sharanyń qaýipsizdigin qamtamasyz etken. Árbir sharaǵa júzdegen polısııa qyzmetkeri jumyldyrylǵan.
Al mundaı is-sharalarǵa jumyldyrylatyn polısııa resýrstarynyń jyl saıynǵy shyǵyny 8-16 mlrd teńge shamasynda baǵalanady. Iаǵnı is júzinde bul shyǵyndardy memleket kóterip keldi, al kommersııalyq is-sharalardy uıymdastyrýshylar tabys taýyp otyrdy.
Djennıfer Lopestiń konserti Astanaǵa 12 myń sheteldik týrıst ákelgen
Sonymen qatar Qazaqstanda jeke kúzet qyzmetiniń damyǵan júıesi qalyptasqan. Qazir elde 4 myńǵa jýyq jeke kúzet uıymy jáne 100 myńǵa jýyq lısenzııalanǵan kúzetshi jumys isteıdi. Endi zańnama buqaralyq is-sharalarda qoǵamdyq tártipti qamtamasyz etý úshin mundaı kompanııalardy shart negizinde tartýǵa naqty múmkindik beredi.
Jańa model resýrstardy tıimdi qaıta bólýge jol ashady. Is-shara uıymdastyrýshylary óz sharalarynyń qaýipsizdigine jaýap beredi, jeke kúzet kompanııalary bul jumysty kásibı deńgeıde atqarady, al polısııa kóshelerdi patrýldeýge jáne qylmystyń aldyn alýǵa kóbirek kóńil bóledi.
Oljas Quspekov bul normalardyń qabyldanýy qoldanystaǵy tájirıbeni ózgertýge baǵyttalǵan júıeli jumystyń nátıjesi ekenin atap ótti. Onyń sózinshe, endi bul ózgerister is júzinde iske asa bastaıdy.