Ulttyq bank elektrondy aqshany shyǵarý, paıdalaný jáne óteý qaǵıdalaryna ózgeris engizdi. Jańa talaptar elektrondy aqsha emıtentterine, tólem uıymdaryna jáne elektrondy aqsha júıeleriniń operatorlaryna qatysty. Qujat 2026 jylǵy 29 sáýirde qabyldanǵan, dep habarlaıdy Egemen.kz.
Sonymen qatar saýda cheginde kórsetiletin málimetter tizimi keńeıtildi. Atap aıtqanda, qujatta tólem somasy, operasııanyń kúni men ýaqyty, chek nómiri, tranzaksııa kody, jiberýshi men alýshynyń elektrondy ámııan derekteri, baılanys nómirleri, operasııa maqsatynyń kody jáne elektrondy aqshany óteýge qatysty málimetter qamtylýy kerek.
«Damý» qory alǵash ret sıfrlyq teńgemen nesıe berdi
Budan bólek, úshinshi tarap qyzmetterin tóleý kezinde tólem qujatynda operasııaǵa qatysýshylardyń tolyq tizbegi kórsetilýge tıis. Bul talap sheteldik tólem deldaldary arqyly júrgiziletin operasııalarǵa da qatysty.
Qaýlyda kıberqaýipsizdik talaptary da kúsheıtilgen. Endi elektrondy aqsha júıesiniń operatorlary kıberqaýipsizdikti basqarý júıesin quryp, onyń turaqty jumysyn qamtamasyz etýge mindetti.
Operatorlar kıberqaýipsizdik saıasatyn bekitip, aqparattyq aktıvterdi qorǵaýǵa baǵyttalǵan ishki qujattardy ázirleýi qajet. Sondaı-aq sıfrlyq ınfraqurylymnyń qorǵanys deńgeıine jylyna keminde bir ret tekserý júrgizilip, nátıjesi boıynsha arnaıy esep daıyndalady.
Ulttyq bankte tirkeýden ótken tólem uıymdary arnaıy kıberqaýipsizdik bólimin qurýy nemese osy salaǵa jaýapty mamandy taǵaıyndaýy kerek. Bul qurylym kıberqaýipsizdik talaptarynyń oryndalýyn baqylap, tıisti jumystardy úılestiredi.
Sıfrlyq teńge – ınvestısııalyq qural emes: Ulttyq bank azamattarǵa eskertý jasady
Qujatqa sáıkes, kıberqaýipsizdik qyzmetkerleriniń biliktiligin arttyrý da mindetteldi. Olar ishki semınarlar men dáristerge qatysyp, keminde eki jylda bir ret syrtqy oqýdan ótýi kerek.
Sondaı-aq jumysqa jańadan qabyldanǵan qyzmetkerler bes jumys kúni ishinde kıberqaýipsizdik talaptarymen tanystyrylyp, arnaıy nusqamadan ótedi. Bul rásim arnaıy jýrnalda nemese ózge de qujatta tirkeledi.