Prezıdent Gonkong Arnaýly ákimshilik aýdany Ákimshiliginiń Basshysy Djon Lımen kezdesý ótkizdi, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaev mártebeli meımanǵa iltıpat bildirip, Qytaı Halyq Respýblıkasy Gonkong Arnaýly ákimshilik aýdany Ákimshiliginiń Basshysy Qazaqstanǵa alǵash ret kelip otyrǵandyqtan bul sapardyń mańyzy aıryqsha ekenin aıtty.
«Bul ýaqıǵa Qazaqstan men Gonkong, keńinen alyp qaraǵanda, máńgi jan-jaqty strategııalyq seriktestik baılanystyratyn Qazaqstan men Qytaı arasyndaǵy yntymaqtastyqty damytýǵa tyń serpin beretini sózsiz. Elderimizdiń arasynda joǵary deńgeıdegi saıası dıalog ornaǵan, saýda-ekonomıkalyq jáne ınvestısııalyq yqpaldastyq qarqyndy damyp keledi. Gonkongpen qarym-qatynasymyz týraly da dál osylaı aıtýǵa bolady», dedi Qasym-Jomart Toqaev.
Memleket basshysy ınvestısııa, ınnovasııa, tehnologııa jáne halyqaralyq saýda salalarynda áleýeti zor Gonkong álemde jetekshi qarjy jáne iskerlik ortalyqtardyń biri retinde erekshe ról atqaratynyn atap ótti. Prezıdent bul sapar ózara tıimdi yntymaqtastyqty nyǵaıtýǵa, iskerlik qarym-qatynasty keńeıtýge jáne ınvestısııa, qarjy, sıfrlandyrý, jasandy ıntellekt, kólik-logıstıka baǵyttarynda birlesken perspektıvti jobalardy júzege asyrýǵa jol ashatynyna senimdi ekenin jetkizdi.
Sondaı-aq Qasym-Jomart Toqaev Qazaqstanǵa salmaqty bıznes-delegasııamen birge kelgeni úshin mártebeli meımanǵa rızashylyǵyn bildirdi. Bul Gonkong iskerlik qaýymdastyǵynyń elimizben yntymaqtastyqty arttyrýǵa úlken qyzyǵýshylyq tanytyp otyrǵanyn baıqatady.
Djon Lı qonaqjaılyq kórsetkeni úshin Prezıdentke alǵys aıtyp, Gonkongtyń Qazaqstanmen keshendi yqpaldastyqty odan ári tereńdetýge daıyn ekenin rastady.
«Atalǵan saparǵa erekshe mán beremin. Menimen shetelge shyqqan delegasııalardyń eń aýqymdysy osy boldy. Onyń quramyna logıstıka, «jasyl» energetıka, taý-ken ónerkásibi, ınnovasııa men tehnologııa jáne bilim berý sııaqty basty salalarda eńbek etetin 75 resmı tulǵa men kásipker endi», dedi Djon Lı.
Gonkong Ákimshiliginiń Basshysy QHR Tóraǵasy Sı Szınpınniń Qazaqstanda kóterilgen «Bir beldeý, bir jol» bastamasy eki el arasyndaǵy berik ári dostyq baılanystardyń jarqyn kórinisine aınalǵanyna toqtaldy.
Memleket basshysy Búkilqytaılyq halyq ókilderi jınalysy Turaqty komıtetiniń tóraǵasy Chjao Leszıdi qabyldady
Onyń aıtýynsha, Qytaı Halyq Respýblıkasynyń arnaýly ákimshilik aýdany sanalatyn Gonkong atalǵan bastamany ilgeriletýge belsendi túrde atsalysyp keledi. Sonymen qatar bul qala óńiraralyq baılanystardyń keńeıýinen mol tabysqa kenelmek.
Qasym-Jomart Toqaev pen Djon Lı ekijaqty kún tártibindegi birqatar naqty máseleni talqylap, saýda-ekonomıkalyq yntymaqtastyqty odan ári jandandyrýǵa ózara múddeli ekenin rastady.
Eske sala keteıik, Prezıdent búgin el turǵyndaryn Halyqaralyq balalardy qorǵaý kúnimen quttyqtady.