Almaty qalasynyń Almaly aýdandyq sotynda jalǵan aqparat taratty dep aıyptalǵan zańger ári bloger Ádilethan Moldahanǵa qatysty sot prosesi bastaldy. Alǵashqy sot otyrysynda aıyptalýshy ózine taǵylǵan aıyppen tolyq kelisetinin málimdedi, dep habarlaıdy Egemen.kz.
Is boıynsha Almaty qalalyq polısııa departamenti basshysynyń burynǵy orynbasary Erjan Uzabaev jáne ákimshilik polısııa basqarmasynyń basshysy Serik Shumaev jábirlenýshi retinde tanylǵan. Sot barysynda Erjan Uzabaevtyń advokaty aıyptalýshydan moraldyq shyǵyn retinde 10 mıllıon teńge jáne sot shyǵyndaryn óteý úshin taǵy 1 mıllıon teńge óndirip berýdi surady.
«Sottalýshy qylmystyq quqyq buzýshylyq jasaǵanyn tolyq moıyndady. Osyǵan baılanysty isti qysqartylǵan tártippen qaraý týraly ótinish berildi. Biz oǵan qarsylyq bildirmeı, bul máseleni sottyń qaraýyna qaldyrdyq. Medıasııa máselesine kelsek, onyń sharttary ázirge bizge belgisiz bolǵandyqtan, bul másele ashyq kúıinde qalyp otyr. Eger taǵylǵan aıyp dáleldense, sottalýshyǵa úsh jylǵa deıin bas bostandyǵynan aıyrý jazasy nemese 3 000 AEK-ke deıingi mólsherde aıyppul salynýy múmkin», dedi advokat Asylbek Ábdiraıymov.
Sotta sýdıa Erlan Qasymbek blogerdi ótinishi boıynsha úıqamaqqa shyǵarýdan bas tartty. Alaıda taraptardyń prosessýaldyq kelisim jasaý múmkindigin qarastyrýdy prokýratýranyń qaraýyna joldady. Ol 16 maýsymǵa josparlanǵan kelesi sot otyrysynda qaralady.
Eske salaıyq, Ádilethan Moldahan Ál-Farabı dańǵylynda bolǵan rezonansty jol-kólik oqıǵasyna qatysty áleýmettik jelide pikir bildirip, apatqa joǵary laýazymdy tulǵalardyń balalarynyń qatysy bolýy múmkin degen málimdeme jasaǵan edi. Osydan keıin oǵan qatysty qylmystyq is qozǵaldy.
Sonymen qatar, búgin atyshýly jol apatyna qatysty sot otyrysynda qaza tapqan eki marqumnyń týystary kináli Aleksandr Pakqa keshirim berdi.