Densaýlyq saqtaý mınıstri Eljan Birtanov ózine hat jazǵan oqýshyǵa Facebook paraqshasynda jaýap berdi.
Raıda esimdi qyzdyń jazýynsha, anasy Ásem – dáriger. Raıda elde tótenshe jaǵdaıdyń jarııalanýyna baılanysty ony táýlik boıy kórmeıtinin aıtady.
«Al keshe meniń týǵan kúnim boldy. 13-ke toldym. Biraq meniń kóńil-kúıim bolmady. Sebebi men úshin eń basty adam – Anam janymda bolmady! Ol mańyzdy ári qaıyrymdy ispen aınalysyp jatqanyn bilemin. Alaıda, ony qashan kóretinimdi bilmeımin... Ol úshin óte ýaıymdaımyn. Ol syrqattanyp qala ma dep qorqamyn. Ol úıge oralmaı ma dep úreılenemin... Eljan Amantaıuly, sizdiń de otbasyńyz bar. Qolyńyzdan kelgenniń barlyǵyn jasańyzshy. Budan-bylaı eshkim aýyrmaıtyndaı etip, anam tezirek úıge oralsynshy. Bul – men úshin eń úlken syılyq bolar edi», - dep jazdy ol.
«Sálemetsiń be, qurmetti Raıda! Seniń hatyńdy ınternetten oqydym. Júregińnen shyqqan shynaıy jyly sózder úshin rızashylyǵymdy bildiremin! Birinshiden, ótip ketken týǵan kúnińmen quttyqtaımyn! Zor densaýlyq tileımin! Jasyńa qaramastan, anańnyń mamandyǵy qanshalyqty mańyzdy ekendigin túsinetinińe súısinemin. Dáriger bolý – bul aýa-raıyna qaramastan, aptanyń qaı kúni, qandaı ýaqyt bolmasyn jáne kóp jaǵdaıda ózińniń sharshaǵanyńa, densaýlyǵyńa qaramastan kómekke umtylýǵa shynaıy nıet», - dep jazdy mınıstr Facebook-tegi paraqshasynda.
Mınıstrdiń jazýynsha, oqýshy qyzdyń hatynan búginde tynbaı eńbek etip jatqan búkil álemdegi medısına mamandarynyń balalarynyń daýysyn estýge bolady.
«Biz, áriptesterimizben – óziń sııaqty balalardyń anasy jáne ákelerimen birge naýqastanǵan adamdar sany neǵurlym az bolýy úshin jáne búkil ǵalamsharda koronavırýs indetiniń taralýyn toqtatýǵa bar kúsh-jigerimizdi salyp jatyrmyz... Anań ekeýiń týǵan kúnińdi jaqyn ýaqytta birge atap ótý úshin qoldan kelgendi jasaýǵa ýáde etemin. Kóńil-kúıińdi túsirme! Barlyǵy jaqsy bolady!», - dep jazdy Densaýlyq saqtaý mınıstri Eljan Birtanov.