Ineniń jasýyndaı bolsa da jaqsylyq jasaý izgiliktiń belgisi. Mundaı ıgi amaldyń el basyna qater tóngende orny tipten bólek. Almaty turǵyndaryn qoldaý maqsatynda «Raýza ADE» dárihanalar jelisi azamattarǵa medısınalyq betperdelerdi tegin úlestirdi. Dárihananyń bastamasyn qala bıligi de qoldaǵan.
Qazirgi ýaqytta jurtqa aýadaı qajet bolyp turǵan qorǵanysh dákesi dárihananyń 9 bólimshesinde taratyldy. Tártipke saı jan basyna 3 medısınalyq betperdeden úlestirildi.
«Bir kúnde 20 myńǵa tarta medısınalyq maska tarattyq. Halyqqa osyndaı tótenshe jaǵdaı kezinde kómekteskimiz keldi. Eger bizge betperde taǵy túsip jatsa, aksııany odan ary qaraı da jalǵastyratyn oıymyz bar», – deıdi dárihana qyzmetkerleri.
Turǵyndar aksııa uıymdastyrýshylaryna óz rızashylyqtaryn bildirdi.
«Jaıbaraqat kezde eleı bermeıtin qarapaıym quralǵa qol jetkizý qıyn bolyp qalar dep kim oılaǵan. Bastapqy kúnderi maska taba almaı ábigerge túskenimiz ras. Tipti kóp jerlerde alaqandaı matanyń baǵasyn sharyqtatyp jibergender de boldy. Dárihananyń bul bastamasy kóńil qýantady», deıdi qala turǵyny Núrken Ábjamalov.
Dárihana ujymy kelýshilerdiń bir-birine ınfeksııa juqtyrmaýyn da nazarǵa alyp, arnaıy shara qabyldaǵan. Qaıyrymdylyq aksııasynyń ýaqyty tańǵy toǵyzdan keshki jetige deıin jalǵasady. Medısınalyq betperdelerdiń bar-joǵyn turǵyndar dárihana jelisiniń ǵalamtorda kórsetilgen telefon nómirlerine habarlasý arqyly bile alady.