Qazaqstan Úndistanda qalǵan 100-ge jýyq otandasymyzdy elge qaıtarý úshin ushaq jiberedi. Bul týraly Qazaqstannyń Úndistandaǵy Elshisi Erlan Álimbaev habarlady.
Qazaqstannyń Úndistandaǵy Elshisi Erlan Álimbaev Facebook paraqshasynda arnaıy beıne-joldaýyn jarııalady.
«О́zderińiz biletindeı, Úndistanda karantın jarııalandy. Iаǵnı, 14 sáýirge deıin el ishindegi kóptegen is-sharalarǵa shekteý qoıyldy. Buǵan deıin 15 sáýir aralyǵynda halyqaralyq áýe reısterine de shekteý qoıylǵan bolatyn. Osyny eskere otyryp, Úndistanda qalǵan 100-ge jýyq qazaqstandyq úshin qolaısyzdyqtar bolatynyn joqqa shyǵarmaımyz», - dedi E. Álimbaev.
Elshiniń aıtýynsha, Qazaqstan úkimeti otandastarymyzdyń oralýy úshin arnaıy ushaq jiberedi.
«QR Úkimeti qazaqstandyqtar úshin arnaıy kommersııalyq ushaq joldaýdy josparlap otyr. Kelisim bolǵan jaǵdaıda «Goa-Shymkent» nemese «Delı-Goa-Shymkent» baǵytynda ushatyn bul ushaq 125-140 jolaýshyny alyp kete alady. 100 jolaýshy bolǵan jaǵdaıda bılet quny 650-700 dollar quraıtynyn eskerýdi suraımyn. Kóptegen azamattar bul baǵanyń joǵary ekenin ashyq aıtty. Degenmen, Úndistanda 14-nen keıin de karantın ýaqyty uzartylatynyn eskere otyryp, oılanyp, elshilikke habarlasyńyzdar», dedi Elshi.