Búkilálemdik ǵalymdar koronavırýspen kúreske kiriskeni belgili. Osy oraıda brıtandyq ǵalymdar eki túrli test oılap tapty. Qos testtiń biri taralǵan ınfeksııany, ekinshisi qazirgi vırýstyq ahýaldy anyqtaıdy. Biraq testti ótkizetin mamandar jetispeı jatyr. Bul týraly Ulybrıtanııanyń The Guardian gazeti jazdy.
Ǵalymdar ózderi ázirlegen eki túrli test jınaǵyn qoldanatyn baǵdarlamalar kómegimen aýrýdyń elge qalaı áser etetinin, taralý qarqynyn boljaýǵa bolatynyn aıtady. Zertteýshiler toby ınfeksııanyń jańa jaǵdaılary qaıda jáne qashan paıda bolatynyn tezirek túsiný kerektigin atap ótti. Sonymen qatar ǵalymdar aýrýdyń kelesi aılardaǵy ahýalyn paıymdaı alýdyń, aldyn-ala belgili bolmasa da ony juqtyrǵan adamdardy anyqtaýdyń óte mańyzdy ekenin jetkizdi. Eki bólek test osy jeke maqsattarǵa qol jetkizýge múmkindik beredi.
Birinshi sanattaǵy – jańadan juqtyrǵan adamdardy anyqtaý úshin medısınalyq personal adamǵa vırýstyq bólshekterdi taba alatyn PTR, ıaǵnı polımerazdy tizbekti reaksııany (PCR – Polymerase Chain Reaction) testten ótkizý kerek. Test koronavırýstyń gendik tizbegin anyqtaıdy, sodan soń ońaı tabýǵa bolatyn birneshe kóshirme jasaıdy.
Bat (Bath University) ýnıversıtetiniń ǵalymy Endrıý Prestonnyń aıtýynsha, test vırýsty anyqtaýda óte tıimdi bolǵanymen, onyń durys nátıjesi medısına qyzmetkerleriniń naýqastardan, muryn men julynnan qanshalyqty jaqsy test alýyna baılanysty.
Aıta keteıik, Ulybrıtanııa úkimeti qazir Oksford ýnıversıtetiniń ǵalymdary tekseristen ótkizip jatqan testterdiń 3,5 mln danasyn satyp alatynyn jarııalady.