Karantınniń negizgi talaby – asa qajettiligi joq bolsa úıden shyqpaý ekenine qaramastan, beı-bereketsiz qańǵı berýge daǵdylanǵandar otbasy, oshaq qasyna sııar emes. Petropavl qalasynda sońǵy alty kúnde ǵana sondaı 106 adam ustaldy.
«Árıne, bizdiń mindetimiz – hattamanyń sanyn kóbeıtý emes, azamattardyń qaýipsizdigin saqtaý. Karantın jaǵdaıynda kúsheıtilgen rejimmen saqshylyq qyzmet atqaryp júrgen polıseılerdiń aldyna sondaı mindet qoıylǵan. Alaıda qoǵamdyq oryndarda betperdeleri bolsa da araqqa bógip alǵandar kezdesip qalady. Mysaly, keshe keshki saǵat toǵyzdar shamasynda Nazarbaev pen Shájimbaev kósheleriniń qıylysynda 52 jastaǵy sondaı adam kezdesti. Ondaıdy qalaı jiberersiń, ne ózi arandap nemese jol apatynyń týýyna sebepker bolýy múmkin ǵoı. Sondyqtan ol aıyqtyrǵyshqa jetkizildi. Munda ústi-basy dızenfeksııalanyp, esin jınaǵansha jatady. Sosyn, árıne buzýshylyq jasaǵany úshin tıisti jazasyn alady», deıdi qalalyq jergilikti polısııa qyzmetiniń bastyǵy Aıdyn Aqmaǵambetov.
Oblystyń tártip saqshylary qazir kóshede júrgen kez kelgen adamdy toqtatyp, júrisiniń ne sebebi baryn anyqtaýyna quqy bar. Tek úı mańyndaǵy dúkender men dárihanalarǵa barýǵa ǵana ruqsat beriledi. Sonymen qatar, árıne jumysqa baratyndarǵa ruqsat. Biraq jumysqa jurt tańerteńgi mezgilde baryp, keshke qaıtady ǵoı. Onyń ústine jumys berýshilerdiń óz qyzmetkerlerin arnaıy kólikpen jetkizýi mindettelgen. Sondyqtan úıge syımaı, kóshe kezip júrgenderdiń «jumysqa bara jatyr edim» degenine eshkim senbeıdi. Kári-qurtań, aýrýshań bireýler bolmasa, qalǵandaryna birden aıyppul salynady. Sondaı syltaý aıtyp, kóshede kólikpen júrgen tehnıkalyq qyzmet kórsetý stansııasynda jumys isteıtin eki adam da ustaldy. Ras, karantın kezinde qyzmettiń bul túrin kórsetýge ruqsat etilgen, biraq jumys ýaqyty shektelgen. Alaıda jumys kúniniń úsh saǵat buryn aıaqtalǵanyna qaramastan bular qala boıynsha júrýlerin toqtatpaǵan. Demek, olar karantın talabyn buzýshylar qataryna engiziledi.
PETROPAVL