Ulttyq Olımpıadalyq komıtettiń uıymdastyrýymen ótip jatqan onlaın suhbatyń kelesi qonaǵy – bokstan Rıo Olımpıadasynyń kúmis júldegeri Vasılıı Levıt boldy. Ol áńgime barysynda Iordanııadaǵy irikteý týrnırine toqtalyp, karantın ýaqytyn qalaı ótkizip jatqany týraly aıtyp berdi.
«Karantın ýaqyty tym jaı ótýde. Únemi úıde bolǵandyqtan shyǵar. Múmkindiginshe jattyǵý jasaýǵa tyrysamyn. Negizinen, úıde bolamyn. Barlyq qaýipsizdik sharalaryn qoldanyp júrmin», deıdi boksshy.
Levıt Ammanda ótken irikteý týrnıri týraly sóz qozǵap, komandanyń daıyndyǵy joǵary deńgeıde bolǵanyn málimdedi.
«Olımpıadaǵa irikteý týrnıri Qazaqstan erler komandasy úshin sátti ótti. Úsh jekpe-jek ótkizdim. Birinshi kezdesýde sharshy alańdy sezinip, boı úırettim. О́ıtkeni, týrnır aqpan aıynda ótýi tıis bolatyn. Biz sol merzimge daıyndaldyq ta, keıin koronavırýsqa baılanysty jarys ýaqytyn aýystyrdy. Sol sebepti, birinshi kezdesý óte mańyzdy edi. Qandaı jaǵdaı bolsa da, birinshi jekpe-jekte jeńý kerek. Ekinshi aınalymda ıordanııalyq boksshymen kezdestim. Bul kezdesý psıhologııalyq turǵyda qıyn soqty. О́ıtkeni, sharshy alań qojaıynyna jankúıerlerdiń qoldaýy jetkilikti edi.
Fınalda kezdesken Jańa Zelandııa boksshysyn qarymdy qarsylas der edim. Tehnıkasy myqty, jekpe-jek te ońaı bolǵan joq. Jeńiske jetýime sebepker bolǵan barlyq bapkerlerge, tutas komandaǵa rahmet. Men buryshtaǵy bapkerler daýsyn tyńdap, olardyń nusqaýyn oryndadym. Týrnır ýaqyty aýystyrylsa da, ózimdi jaqsy sezindim. Bapkerler jaqsy jumys istedi. Psıhologııalyq, fızıkalyq turǵydan daıyn edim», deıdi Vasılıı Levıt.
Sondaı-aq ol Olımpııa oıyndarynyń kelesi jylǵa aýysqanynyń tıimdi tusyn atady.
«Men bul jańalyqty qalypty qabyldadym. О́zi de solaı bolý kerek edi. Qazir optımısterdiń óz pikiri, pessımıstterdiń de ózindik oıy bar. Biraq meniń pikirim optımısterge keletin sııaqty. Osy jyly qatelikterimmen jumys istep, kelesi jylǵy Olımpıadaǵa 100 paıyz babymda baramyn».