Elbasynyń halyqqa arnaǵan Úndeýin jáne sonyń negizinde jarııalaǵan «Birlese bilgen el bárin jeńedi» atty maqalasyn zor yqylaspen oqyp shyqtyq.
Rasyn aıtý kerek, jahandyq indet – koronavırýs jan-jaqtan antalaǵanda, kóp etnosty halqymyz ár dara tulǵanyń pikirine de, kóńildi demdeıtin sózine de zárý bolyp turady.
Elbasynyń «Birlese bilgen el bárin jeńedi» atty Úndeýin tórt baǵdarda jiktep qaraýǵa bolady.
Birinshi baǵdar – jahandyq syn-qater aıasyndaǵy Qazaqstannyń izdenisine, birligine baǵa.
Ekinshi baǵdar – sońǵy otyz jylǵy órkendi tájirıbeniń mán-mańyzyn saralaý.
Úshinshi baǵdar – álemdik indettiń el aýmaǵynda taralýyn meılinshe azaıtýǵa baılanysty keshendi is-sharalardy naqtylaý.
Tórtinshi baǵdar – «Máńgilik el» ıdeıasy jolynda el rýhyn shyńdaıtyn, birlik pen berekeni ornyqtyratyn qundylyqtarǵa adaldyq.
Tuńǵysh Prezıdenttiń: «Biz aýyrtpashylyqty osyndaı syn saǵatta septigin tıgizetin halqymyzdyń tózimdiligi, erik-jigeri jáne ózine degen zor senimi arqasynda mindetti túrde jeńip shyǵamyz. Ol úshin bizge qajetti nárse – qarjy-qarajat, materıaldyq resýrs, tehnıka, azyq-túlik – bári bar. Alańdaıtyn, abyrjıtyn esh negiz joq» degen aq tileýli senimdi sózi halyqty odan saıyn jigerlendire tússe, «Men halyqty ártúrli sondaı azǵyryndy, arzan áńgimelerge erýden saq bolýǵa shaqyramyn. Shynymen kóptiń qamyn kózdeıtin adam aıǵaıshyl kúshimen emes, ıgilikti isimen qyzmet etkeni durys. Ǵaıbat pen baıbalam ornyna ǵylym-bilimmen shuǵyldanǵan abzal» degen salıqaly baılamy jurtshylyqtyń alań kóńilin ornyqtyrýǵa demeý bolady.
Úndeýde Tuńǵysh Prezıdent eldegi áleýmettik-ekonomıkalyq ahýaldy jiti paıymdaı otyryp, asa mańyzdy keńesin de ortaǵa salady: «Endi Úkimet pen jergilikti atqarý organdary sony únemdi túrde, ret-retimen oryndaýǵa kirisýi kerek. Ár mınıstr, árbir oblys, qala jáne aýdan basshylary júıemen, tártippen, úılesimmen, naqty josparmen, nyq senimmen áreket etip, ýaqytsha qıyndyqtan shyǵýǵa barlyq kúsh-qýatty jumyldyrýy qajet. Nur Otan partııasynyń músheleri de osy bir saýapty istiń aldyńǵy qatarynan tabylýǵa tıis».
Dál qazir senim – asa zor kúsh, sonymen birge memleket qundylyqtarynyń bastaýy. Elbasy halyqqa arnaǵan Úndeýinde bul dilgir máseleni de aıryqsha zerdelegen. «Adamnyń ózine degen senimi – úlken kúsh, deıdi Nursultan Ábishuly. – Bul boıymyzǵa – qajyr, denemizge – qýat, júregimizge senim uıalatady. Biz qazir kómekke asa muqtaj qarııalardy, ardagerlerimizdi, kópbalaly analardy, ál-aýqaty tómenderdi, jumysqa jaramsyz jandardy erekshe qamqorlyqqa alýymyz kerek. Halqymyzdyń boıyndaǵy urpaqtan-urpaqqa úzilmeı jetken eń izgi qasıetter bizdi osyǵan úndeıdi».
Úndeý-maqaladaǵy Tóle bı, Áıteke bı, A.Qunanbaıuly, B.Momyshuly syndy el danalarynan, Mahatma Gandı sekildi álem tulǵasynan alynǵan dáıekterdiń de ár sózi, ár uǵymy júrekten – júrekke, tilekten – tilekke jetkendeı. Mundaıda halqymyz «Sóz jaqsysy – dátke qýat» deıdi.
Tutastaı alǵanda, Elbasynyń «Birlese bilgen el bárin jeńedi» atty zamana sózin – dál búgin ári aqyl, ári naqyl dep sanaımyz.
Asa jaýapty kezeńde halyqty bereke-birlikke shaqyra otyryp, syn-qaterden aman ótýdiń jolyn nusqaǵan Elbasynyń júıeli pikirin, ustanymyn – adastyrmas eldik tujyrymdama deýge tolyq negiz bar.
Erlan Sydyqov,
L.N.Gýmılev atyndaǵy Eýrazııa ulttyq ýnıversıtetiniń rektory, akademık