Fransııa prezıdenti Emmanýel Makron Qytaıdyń koronavırýsqa qatysty aqparatty ashyq aıtpaýy múmkin ekenin málimdedi. Bul týraly Financial Times gazetine bergen suhbatynda aıtty.
E.Makron atalǵan basylymnyń kezekti suraǵyna jaýap bergende Qytaıdyń koronavırýspen kúresi sátti ótkenine sený ańǵaldyq ekenin jetkizdi. Financial Times tilshisi «Qytaıdyń indetpen kúresýge qatań tártip ustanýy batys demokratııasynyń álsizdigin bildirmeı me?» dep suraǵan. Makron ashyq qoǵam men shyndyq aıtylmaıtyn qoǵamdy salystyrmaý kerektigin aıtty.
«Osy erekshelikterdi eskerip, Qytaıdyń indetpen kúreste bizge qaraǵanda sátti áreket etkenine sený ańǵaldyq. Bizge belgisiz. Onda bizge beımálim jaǵdaılar bolǵany anyq», dedi Fransııa prezıdenti.
E.Makronnyń Qytaıǵa tıise ketýi beker emes. Fransııadaǵy Qytaı elshiliginiń saıtynda batys elderi qarııa kisilerge kómektespeı, ólýge qaldyryp ketti degen maqala jarııalanǵan-dy.
Atalǵan jazba úlken daý týǵyzdy. Osyǵan baılanysty, Fransııanyń Syrtqy ister mınıstrligi Qytaı elshisin shaqyryp alyp, biraz «sabaq» berip jibergenge uqsaıdy. Kóp uzamaı Qytaı úkimetiniń ókili Chjao Lıszıan Beıjiń tarapy Fransııanyń pandemııamen kúrestegi is-qımyldaryna shák keltirmeıtinin málimdedi.
Aıta keterligi, qazirgi tańda Fransııada koronavırýspen aýyrǵandar sany 150 myńǵa jaqyndap, 20 myńǵa jýyq adam qaza tapty.