Bul týraly «Bolashaq» halyqaralyq baǵdarlamalar ortalyǵynyń prezıdenti Aınur Káribozova onlaın-brıfıngte baıandady. Eleýli ózgerister Bilim jáne ǵylym mınıstrliginiń «Halyqaralyq baǵdarlamalar ortalyǵy» AQ baǵdarlamanyń iske asyrylýyna júrgizilgen monıtorıng nátıjeleri, sondaı-aq sybaılas jemqorlyq táýekelderin taldaý negizinde qolǵa alynǵan.
– Biz engizip jatqan ózgerister, eń aldymen «Bolashaq» stıpendııasyn taǵaıyndaýdyń ashyqtyǵyn arttyrýǵa baǵyttalǵan. Biz osy kúnge deıin bolǵan barlyq yqtımal sybaılas jemqorlyq táýekelderin joıdyq. Biz elimizdegi tek úzdikterdiń úzdigi ǵana halyqaralyq prezıdenttik stıpendııa boıynsha bilim alǵanyn qalaımyz, – dedi A.Káribozova.
Ortalyq joldaǵan arnaıy baspasóz habarlamasynda atalǵan ózgeristerdiń eń aldymen ashyqtyqty arttyrýǵa, barlyq úmitkerler úshin teń múmkindikter jasaýǵa, irikteýdiń obektıvtiligin kúsheıtýge, sondaı-aq bıýrokratııalyq kedergiler men burynǵy máselelerdi sheshýge baǵyttalǵany aıtylǵan.
Engiziletin ózgerister týraly:
«1. Basym mamandyqtardyń jańa tizbesi
Stıpendııa alýǵa bolatyn basym mamandyqtar tizbesi eńbek naryǵy qajettilikteriniń orta merzimdi boljamyn eskere otyryp qalyptastyrylady. Ony jumyspen qamtý máseleleri jónindegi ýákiletti organ áleýmettik-ekonomıkalyq damý perspektıvalary men taldaý negizinde jasaıtyn bolady. Bul Qazaqstan Respýblıkasynyń kásiporyndary men uıymdaryna qajet joǵary bilikti kadrlardy daıarlaýǵa kómektesedi.
Halyqaralyq stıpendııaǵa úmitkerlerge arnalǵan kvotalyq sanattar qysqartyldy
Stıpendııaǵa úmitkerlerdiń barlyǵyna múmkindik birdeı. Úmitkerlerdiń barlyq jeńildik kvota sanattary alynyp tastalady. Barlyq úmitkerler sheteldik joǵary oqý oryndaryna ózbetinshe túsýleri tıis.
Sondaı-aq, jańa Qaǵıdalarda aýyldyq jerden shyqqan úmitkerlerdi qospaǵanda, buryn usynylǵan aldyn ala tildik daıyndyq kýrstary alyp tastaldy.
Halyqaralyq stıpendııaǵa úmitkerlerge qoıylatyn memlekettik jáne shet tilderin bilý talaptaryn arttyrý
Jańa Qaǵıdalar boıynsha irikteý týrlary sheńberinde tilderdi bilý deńgeıin tekserý alyp tastalǵan. Úmitkerler ózbetinshe test tapsyrýlary jáne qujattardy tapsyrý kezinde memlekettik (KazTEST V1) jáne shet tilinen (keminde IELTS 6.5) sertıfıkat usynýlary tıis.
Halyqaralyq stıpendııa taǵaıyndaýǵa arnalǵan barlyq úmitkerler úshin konkýrstyq irikteý týrlarynyń sanyn qysqartý
Konkýrstyq irikteý kezindegi 6 týrdyń ornyna barlyǵy 3 týr bolady. Ýájdemelik jáne usynys hattaryn baǵalaý, sondaı-aq memlekettik jáne shet tilderin bilý deńgeıin anyqtaý boıynsha irikteý týrlary qysqarady. Irikteý týrlarynda zııatkerlik jáne emosıonaldyq IQ deńgeıin anyqtaýǵa arnalǵan keshendi testileý, Táýelsiz saraptamalyq komıssııa múshelerimen jeke áńgimelesý jáne Shetelde kadrlar daıarlaý jónindegi respýblıkalyq komıssııanyń úmitkerlerdi qarastyrýy qamtylady.
Táýelsiz saraptamalyq komıssııanyń jumysy
Táýelsiz saraptamalyq komıssııanyń (TSK) quramyna qoıylatyn talap kúsheıtiledi, endi komıssııa quramyndaǵy 3 adamnyń ornyna keminde 5 adam sheshim qabyldaıdy. Úmitkerlerdi irikteýdiń búkil prosesi jáne barlyq komıssııa otyrystary onlaın taratylady. О́z jumysynyń barysynda komıssııanyń qoıa alatyn barlyq suraqtary, onyń ishinde qosymsha suraqtary da naqty reglamentteledi.
Qujattardy qabyldaý men konkýrstyq irikteý rásimin avtomattandyrý
Elektrondyq úkimettiń veb-portalynda úmitkerdiń jeke kabıneti arqyly úmitkerlerdiń qujattaryn qabyldaý prosesi tolyqtaı avtomattandyryldy. Qazirgi tańda adamı faktordyń qatysýyn azaıtý maqsatynda konkýrstyq irikteý kezeńderiniń avtomattandyrylýyn qamtamasyz etý jumystary júrgizilýde. Atap aıtqanda, búkil irikteý prosesi Prezıdenttik kadrlyq rezervke irikteý úlgisi boıynsha sıfrlyq platformany paıdalaný arqyly júrgiziledi.
Ortalyq sonymen birge qadamdyq nusqaýlyqtar ázirleıdi jáne reglamentteýshi qujattarǵa sáıkes konkýrstyq irikteýge qatysatyn qyzmetkerlerdiń jaýapkershiligin kúsheıtedi.
Ákimdeýshini sapaly qaıta júkteý
2019 jylǵy qyrkúıekten bastap baǵdarlama ákimshisiniń jumysynda ózgerister bolyp jatyr: Ortalyqtyń Dırektorlar keńesi 4 táýelsiz dırektordy qosý arqyly kúsheıtildi, beıindik bólimshelerge kásibı kadrlar qabyldandy, onyń ishinde «Bolashaq» baǵdarlamasynyń túlekteri bar, sheteldegi ókildikter sany qysqartyldy. Baspasóz hatshysy jáne ádep jónindegi ýákil laýazymdary engizildi, 2 keńesshi men Ortalyqtyń 1 vıse-prezıdenti laýazymdary qysqartyldy, sondaı-aq Ortalyqtyń shtaty qysqardy.
Komplaens-ofıser laýazymy engizildi, jumysynyń maqsaty – múddeler shıelenisin retteý, sondaı-aq Qazaqstan Respýblıkasynyń qoldanystaǵy zańnamasyn buzýǵa baılanysty yqtımal táýekelderdiń, onyń ishinde sybaılas jemqorlyqtyń aldyn alý. Konkýrstyń barlyq kezeńderiniń barynsha ashyq ótýine qol jetkizý jáne obektıvti sheshim qabyldaý maqsatynda bos laýazym oryndaryna jańa qyzmetkerlerdi qabyldaýdy sıfrlandyrý boıynsha jumys júrgizilýde», delingen.
Aıta keteıik, jańa Qaǵıdalar Úkimet Qaýlysymen bekitilgennen keıin «Halyqaralyq baǵdarlamalar ortalyǵy» AQ www.bolashak.gov.kz resmı saıtynda jarııalanady.