Qaı kezde de ıgi ister men qaıyrymdylyq sharalardyń basy-qasynda júretin Mysyr eliniń maqtanyshy, Anglııanyń «Lıverpýl» klýbynyń betke ustar fýtbolshysy Muhammed Salah taǵy da márttik tanytty.
27 jastaǵy tórtkúl dúnıedegi teńdessiz teńbil dop sheberleriniń biri COVID-19 indetine qarsy kúreske óz úlesin qosý maqsatynda Mysyr eline 1 myń tonna azyq-túlik pen tamaq jóneltti. Osynyń aldynda ǵana ol Egıpettegi aýrýhanalarǵa qarjylaı kómek kórsetken bolatyn.
Dúnıejúzilik densaýlyq saqtaý uıymy qazirgi kezde atalmysh memlekette 3 000-ǵa jýyq adamnyń koronavırýs dertine shaldyqqany jóninde málimet taratyp otyr. Olardyń 205-i qaıtys bolsa, 646-sy aıyǵyp shyqqan.
Jalpy Muhammed Salah óz otandastaryna qamqor qolyn sozýdan eshýaqytta tartynǵan emes. О́z Otanynda ol sport keshenderi men fýtbol alańdaryn, mektepter pen aýrýhanalar saldy. Kedeıshiliktiń qamytyn kıgen balalardyń ómirdegi óz joldaryn tabýǵa Muhammed únemi járdemdesip júr.
Osy oraıda myna bir jaıtqa toqtalmaı ketýge bolmaıdy: 2017 jyly Egıpet úkimeti ózderiniń ulttyq valıýtasyn qunsyzdanýdan saqtap qalý úshin álemniń ár qıyrynda júrgen baı-qýatty azamattardan mol kólemde qarajat suraýǵa májbúr boldy. Aıtýly teńbil dop sheberi bul usynysty eń birinshi bolyp qoldady. Márt Muhammed arada bir apta ótpeı jatyp, arnaıy esepshotqa 210 myń brıtan fýntty kóleminde qarjy aýdardy.