Jańalyqpen Aqtaýdaǵy «Mańǵystaý-adaldyq alańy» jobalyq keńsesinde ótken jıynda óńirlik jolaýshylar kóligi jáne avtomobıl joldary basqarmasynyń basshysy Bolat Erejepov bólisti, dep habarlaıdy «Jol aktıvteri ulttyq sapa ortalyǵy» RMK Mańǵystaý oblystyq fılıaly baspasóz qyzmeti.
Onyń aıtýynsha, Mańǵystaý, Túpqaraǵan jáne Beıneý aýdandaryna qarasty aýyldarǵa kirme jol salý jumystary jýyq arada bastalady dep kútilýde.
- Shaıyr aýylynyń turǵyndarynyń qýana berýine bolady. О́ıtkeni, kirme joldyń joqtyǵy sońǵy jyldary jıi kóterilip júrgen máseleniń biri. Qazirgi tańda jalpy uzyndyǵy 2,8 shaqyrymdyq trassany salýǵa qajet qarjy qaralyp tur. Mańǵystaý aýdanynyń ákimdigi konkýrs oınatýy kerek. Jeńimpaz merdiger anyqtalǵan soń jol qurylysy bastalýy kerek, - dedi ol.
Sondaı-aq osy aýdanǵa qarasty Jarmysh aýylyna da uzyndyǵy eki shaqyrymdyq kirme jol bıyl salynýy tıis. Ortalyq eldi meken - Shetpeden shyǵaberistegi uzyndyǵy 0,21 shaqyrym, Qaraqııa aýdanynyń Eraly stansııasyna 12,5 shaqyrymdyq kirme joldar salynady. Dál osyndaı joba Beıneý aýdanynyń Syńǵyrlaý aýyly men Túpqaraǵandaǵy Qyzylózen aýylynda taıaý arada júzege asa bastaıdy dep kózdelgen.
Aıta keteıik, atalǵan trassalardyń barlyǵy birdeı keńestik kezeńde salynǵan. Ýaqytynda jóndeý kórmegen soń tozyǵy jetip, kóliktiń júrýine jaramsyz jaǵdaıda tur. Endi olar qalpyna keltiriletin boldy. Tıisti qarajat sheshilgen.
Endi osy kirme joldar tıesili eldi meken ákimdikteri konkýrs oınatyp, merdiger mekemeler anyqtalady. Munan soń jumys bastalady. О́z kezeginde memleket qarjysy bólingen bul jobalar da jol sapasyn baqylaýshylardyń jiti nazarynda bolady degen sóz.
Salý kezinde kemshilikter anyqtalǵan jaǵdaıda ony túzetý birinshi kezekte merdigerge júkteledi.