Elorda ákimi Altaı Kólginov «Jastar» shaǵyn aýdanynda kollektorlardy qalpyna keltirý men tazartý qubyrlarynyń qurylys barysymen, sondaı-aq, A. Toqpanov pen B. Momyshuly kósheleriniń qıylysyndaǵy nóserlik sý káriziniń qurylysymen tanysty.
Memleket basshysy nóserli jańbyr sý jınalýynyń aldyn alý úshin kárizderdi salý jumystarynyń qarqynyn arttyrýdy tapsyrdy. «Jastar» shaǵyn aýdanyndaǵy jańa qurylystardyń qýaty táýligine 42 myń tekshe metrden asady. Bul nóserlik sý kanalızasııasynyń ótkizý qabiletin aıtarlyqtaı jaqsartýǵa múmkindik beredi: bógetsiz jınaýdy, jer ústi aǵyndaryn burýdy jáne tazartýdy qamtamasyz etedi.
Tazartý qurylǵylary Tashenov, Baraev, Ýálıhanov, Imanbaev jáne Respýblıka dańǵyldarynyń jańbyrly sý basýyn boldyrmaýǵa múmkindik beredi. Tazartý qurylǵylary jer astynda ornalasqandyqtan, qurylǵy ústindegi aýmaqta abattandyrý jumystaryn júrgizý, shaǵyn sáýlet nysandaryn ornatý qarastyrylǵan.
Qurylys jumystaryn 2021 jyly aıaqtaý josparlanyp otyr. Ekinshi nysan B. Momyshuly jáne Toqpanov kósheleriniń qıylysyndaǵy nóserli sý kárizdik tazartý qurylǵysynyń qurylysy boldy. Qazirgi ýaqytta qurylys-montajdaý jumystary júrgizilip jatyr. Bes uńǵyma ýchaskelerinde sý aǵyzý jáne sý deńgeıin tómendetý jumystary oryndaldy, 130 metrden astam magıstraldy kollektor jáne t. b. salyndy.
Qazirgi tańda elordanyń nóserlik sý káriz júıesi 15 tazartý qurylǵysynan, 3 jınaǵysh toǵannan, 390 km magıstraldy kollektordan, aryq jelisinen, 64 sorǵy stansııasynan, shamamen 20 myń jańbyr sýlaryn qabyldaıtyn qudyqtan turady. 2019 jyly Myńjyldyq alleıasy aýmaǵynda eki ýchaskedegi nóserlik sý káriziniń máselesi sheshildi.