Prezıdent janyndaǵy Ortalyq kommýnıkasııalar qyzmetiniń alańynda kóktemgi egis naýqany men sharýalardy qarjylandyrý jumystarynyń atqarylý barysyna arnalǵan baspasóz máslıhaty ótti.
Jıynda belgili bolǵandaı, karantınge qaramastan, aýyl sharýashylyǵy taýaryn óndirýshiler kóktemgi egis jumystaryn qarqyndy atqaryp jatyr. Egis naýqany 7 óńirde júrgizilýde. Sonyń ishinde elimizdiń ońtústik aımaqtarynda jazdyq egis alqabynyń 80 paıyzy egildi.
– Memleket basshysy kóktemgi egis jumystaryn tıisti merzimde júrgizý úshin jaǵdaı jasaýdy tapsyrdy. Bul tapsyrmanyń oryndalýy mınıstrlikte de, ákimdikte de barlyq deńgeıde júzege asyrylýda. Jambyl oblysynda – 326 myń, Almaty oblysynda – 239 myń, Túrkistanda – 230 myń, Qyzylordada – 28 myń gektar jerge egin egildi. О́zge óńirlerde de egis jumystary bastalý satysynda. О́ńirler arzandatylǵan janar-jaǵarmaımen, tuqymmen qamtamasyz etilgen, tyńaıtqysh jiberilip jatyr. Tehnıkalar daıyn, – dedi Aýyl sharýashylyǵy mınıstriniń birinshi orynbasary Aıdarbek Saparov.
Karantın kezinde azamattardyń júrip-turýyn shekteýge baılanysty blok-beketterden ótý qıyndyǵyna qatysty redaksııamyzǵa fermerlerden, salalyq qaýymdastyqtardan kóptegen shaǵym kelip túsken bolatyn. A.Saparovtyń aqparaty boıynsha, bul másele sheshimin tapqan syńaıly.
– Bul rette Ishki ister mınıstrligi kóktemgi egis jumystaryn júrgizýdiń mańyzdylyǵyn jer-jerdegi barlyq polısııa qurylymdaryna jetkizdi. Aqmola jáne Qaraǵandy oblystary blok-beketterdiń jumysyn jeke tekserdik. Fermerler kedergisiz ótýde. Árıne túsinispeýshilikter bolýy múmkin, dese de biz barynsha jedel jumys istep jatyrmyz. Eń bastysy, ákimdikter jergilikti jerlerde der kezinde áreket etip, shuǵyl shtabpen baılanys ustaýy qajet. О́ıtkeni shuǵyl shtab ókilderi kúnde blok-beketterde jumys isteıdi, – dedi birinshi vıse-mınıstr.
Sonymen qatar A.Saparov kóktemgi egis jumystaryna Elbasynyń tapsyrmasy boıynsha 100 mlrd teńge bólingenin atap ótti. Bul qarjy tolyǵymen aýyl sharýashylyǵyn qoldaýǵa jumsalady.
Baspasóz máslıhaty barysynda «Ulttyq agrarlyq ǵylymı-bilim berý ortalyǵy» KeAQ basqarma tóraǵasy Tóleýtaı Raqymbekov eńbek óńimdiligi 2,5 esege artatynyn tilge tıek etti.
– Kóktemgi egis jumystary bastalǵanǵa deıin topyraq jaǵdaıyn, klımatty eskere otyryp fermerlerge 100-den astam usynys jasadyq. Dıqandarmen 52 onlaın-keńes ótkizdik. Shetelden mamandardy da tarttyq. Keńeske 60 myńnan astam adam qatysty. Efır barysynda túsken suraqtar saraptalyp, tıisti jaýap berildi. Aldaǵy ýaqytta 400-ge jýyq onlaın-keńes ótkizýdi josparlap otyrmyz, – dedi T.Raqymbekov.
Aıta keteıik, bıyl fermerlerdiń ónimin forvardtyq satyp alýǵa erekshe nazar aýdarylmaq. Bul týraly «Azyq-túlik kelisimshart korporasııasy» UK» AQ basqarma tóraǵasy Qanat Qaraýylov aıtty.
– Forvardtyq satyp alýǵa qajetti bıýdjet qarajatynyń jalpy somasy 24,5 mlrd teńgeni quraıdy. Qarjylandyrý aldyn ala tólem arqyly júzege asyrylady. Mysaly, bıdaıǵa qatysty aldyn ala tólem bir tonnasyna 50 myń teńgeden bolady. Qalǵan soma kúzde qalyptasatyn naryqtyq baǵalar negizinde esepteledi, – dedi Q.Qaraýylov.
Al «Agrarlyq nesıe korporasııasy» AQ basqarma tóraǵasy Baǵlan Qultaev nesıe boıynsha paıyzdyq mólsherleme 7%-dan 5%-ǵa deıin tómendeıtinin jetkizdi. Ári «Keń dala» nesıelendirý baǵdarlamasy boıynsha jeńildetilgen nesıemen 2346 agroónerkásip sýbektisine qoldaý kórsetilmek. Sondaı-aq sharýalar usynatyn qujattar tizbesi de qysqartylady. Bul nesıe alý úshin esikten esikke júgirgen fermerlerge úlken kómek bolmaq.