Tótenshe jaǵdaı kezinde medısına men polısııa qyzmetkerlerine qoldaý kórsetýge umtylǵan eriktiler kóbeıe túsýde. Solardyń qatarynda otandyq munaıshylar da bar.
– «Embimunaıgaz» AQ-da eriktiler qyzmeti jolǵa qoıylǵan. Bul joly kompanııa ujymy karantındegi medısına jáne polısııa qyzmetkerlerine materıaldyq kómek kórsetýge qoldaý bildirdi. Osy maqsatta kompanııanyń basqarý apparatynyń basshylyq quramy men «Munaıshy qyz» klýbynyń músheleri jeke qarajaty esebinen 1 mıllıon teńgeden astam aqsha jınady. Bul qarajat joǵaryda atalǵan sala qyzmetkerlerin qoldaý retinde aýdarylady, - dedi «Embimunaıgaz» AQ basqarma tóraǵasynyń orynbasary, «Munaıshy qyz» áıelder klýbynyń tóraǵasy Rysty Tasmaǵambetova.
Kompanııanyń qoǵammen baılanys qyzmetiniń habarlaýynsha, buǵan deıin «Embimunaıgaz» AQ oblys ákimdiginiń suranysymen Atyraý qalasynyń Bereke yqshamaýdanyndaǵy turǵyn úılerde oqshaýlanǵan azamattardy turmystyq buıymdarmen, azyq-túlikpen, sondaı-aq, kúndelikti tutynýǵa qajetti zattarmen qamtamasyz etýge demeýshilik jasady. Sonymen birge, sońǵy bes jylda kompanııadaǵy eriktiler qyzmetiniń bastamasymen qazaqstandyq kópbalaly 21 otbasy turǵyn úımen qamtyldy. Al, byltyr bul ujym respýblıkalyq «Arys. Biz birgemiz!» aksııasyna qatysyp, Arys qalasyndaǵy az qamtylǵan kópbalaly otbasylardyń 400-den astam oqýshysyna mektepke qajetti quraldar men kıim-keshekter alyp bergen edi. Mundaı kómekti Atyraý qalasy men aýdandardaǵy áleýmettik az qamtylǵan otbasylardyń 70 balasy alǵan.